Ngai òr (01/03), tàm dơ̆ lòt lơh broă tàm ală càr tiah tàm Gùl lơgar, Thủ tướng Cíñ phủ ồng Phạm Minh Chính lòt sền ală rơndăp broă lơh gùng lòt tờm, tàm hơ̆ geh: gùng rơndeh lòt mhar Quảng Ngãi – Hoài Nhơn, gơl lòt gan ală trồm gùng Đức Phổ mờ Bình Đê; gùng rơndeh lòt mhar Hoài Nhơn – Quy Nhơn mờ Rơndăp broă lơh gùng mù gùng par sồ 2 mờ ală broă lơh ndrờm bal tàm Ƀlàng rơndeh par Phù Cát, càr Gia Lai.

Tàm tiah lơh rơndăp broă lơh gùng mù mờ gùng par sồ 2 bal mờ ală broă lơh ndrờm bal gơwèt Ƀlàng rơndeh par Phù Cát, càr Gia Lai, Thủ tướng jờng rơ nùs nhơm lơh broă huĭ să tờm bơh mpồl cau chài, cau lơh broă ờ ngòt trồ tơngai, trồ mìu, “sào sơbăc, bic mhar”. Sền mùl màl mờ iăt jơnau yal tàm tiah lơh gùng, Thủ tướng sồr ală mpồl lơh broă gơrềng bal lơh ngan tơrmù tơngai geh ai 3 nhai, nàng tàm bồ quý III nam 2026 ai broă lơh gùng do mŭt tàm broă ngui lơh broă, ala mờ tus nhai 9 nam 2026 bè broă rơndăp neh geh ai, mờ sồr tàm tơngai tus pal lơh geh uă cồng nha tŭ broă lơh neh geh ngui lơh broă; jào càr Gia Lai atbồ, lơh mờ ngui Ƀlàng rơndeh par Phù Cát tàm kơrnoăt geh ai “cau lơh jăk den jào cau hơ̆” in.