Chờ gờm tơngkah kir sơnrai 80 nam Ngai tơnggơs Mpồl ling klàng Làng bol Việt Nam, 35 nam Ngai chờ jơh gùt làng bol sền gàr dà lơgar, drim ngai 19/12, Thủ tướng Cíñ phủ ồng Phạm Minh Chính tus bal sơnđờm mŭt lơh Ràng tơlik Sền gàr dà lơgar ală lơgar Việt Nam nam 2024- broă tờm mờ là bơta tờm gơcèng bơta kwơ, bơngă ndrờm pal ală lơgar.

Đơs tàm dơ̆ sơnđờm mŭt lơh, mờ lĭp tơl iă sơnđờm mŭt lơh Ràng tơlik, Thủ tướng Cíñ phủ ồng Phạm Minh Chính đơs là Ràng tơlik Sền gàr dà lơgar ală lơgar Việt Nam nam 2024 geh gơtha is ồn ngan, là broă lơh ală lơgar pơnrơ ngan bal mờ jơnau đơs “Ring lơngai- Lơh broă bal- Bơtàu tơngguh”, pơgồp bơnah chồl tơngguh lơh broă mờ lơgar ndai- lơh broă bal sền gàr dà lơgar tàm jơh ală broă; tài ring lơngai, kơ̆ kơl jăp, lơh broă bal mờ bơtàu tơngguh tàm kơnhoàl ù tiah do mờ tàm dunia. Thủ tướng đơs nền, Việt Nam ờ tŭ lơi tam gơl lơh jăt gùng dà lơh broă mờ lơgar ndai “ờ kơldìng, lơh tờm is, lơh bơyô mờ ală lơgar, lơh uă bơta gĭt gơ̆p, là bơyô niam, là cau lơh broă bal pin dờn mờ jơh ală lơgar mờ là lơgar tàm mpồl jơh nùs, geh kơnòl bơh mpồl bơtiàn ală lơgar dê.