Mho ngai 22/9, tàm Hìu lơh broă Cíñ phủ, Thủ tướng Cíñ phủ ồng Phạm Minh Chính đơng lam dar pơrjum dơ̆ 1, Mpồl sồr lơh dà lơgar bè broă lơh hìu ơm mờ drà ù tiah hìu đam. Thủ tướng sồr, lơh loh geh halà ờ bơta lơh gơ rềng tus drà ù tiah hìu đam nàng bơsong wơl, kuơmàng là pal gơtùi hơ jơnau lùp ñchi bơh tài giă hìu ơm bal gơ jơnhua mờ jơnhua sùm… Jat jơnau yal tàm dar pơrjum, tàm 9 nhai do, gùt lơgar geh 1 rbô 816 rơndap broă lơh hìu ơm, tiah drà pa geh lam lơh. Khà tac bro ù tiah hìu đam tàm tơngai lài geh rlau 430 rbô dơ̆; giă hìu ơm tŭ do gam gơ ơm tàm khà jơnhua ngan.

Tàm dar pơrjum, Thủ tướng ồng Phạm Minh Chínhd dơs loh: broă lơh lơh hìu ơm mờ drà tac bro ù tiah hìu đam geh bơngă dờng màng ngan, pơgồp bơnah chồl tơnguh gơguh lơh sa, tơnguh bơta niam rài kis làng bol dê, lơh gơlik muh mat pa dà lơgar in. Thủ tướng đơs sùm uă ngan tus broă lơh hìu ơm, dong làng bol geh blơi mờ ơpah blơi, gàr niam gơnoar kòn bơnus mờ ơm kis lơngăp lơngai, iang nùs lơh broă lơh sa. Thủ tướng đơs sùm nùs nhơm “jơh ală tài làng bol, tài dà lơgar, lơh ngan uă, pơnđơl pràn dờng, lơh broă pal kràñ cê, jơh nùs, lơh broă lơi gơlik broă hơ̆, lơh broă lơi jơh broă hơ̆; sồr lơh pal 6 loh: loh cau, loh broă, loh tŭ tơngai, loh gơnăp gơnoar, loh kơnòl mờ loh phan lơh gơs nàng kờñ lơh gơlik bơta tam gơl pa, tam gơl pràn tàm bơtàu tơnguh hìu ơm mờ drà tac bro ù tiah hìu đam.