Tàm dơ̆ tìp mat, Thủ tướng nting bơr ală cau kơlôi sơnơng jak chài, cau geh jơnau git wă jrô, cau đơng lam broă gah lơh sơnơm, mpồl y ƀák sìh, cau lơh sơnơm in 20 akhar: “Gàr wil tơl nùs nhơm lơh sơnơm – Kơ̆ dơn tàm bơta chài lơh sơnơm – Tơnguh gơnoar broă dờng bơh ală jơnau pal jat tàm gah lơh sơnơm – Sơrlèt gan bơta kal ke – Jơh ală tài làng bol” mờ sồr” Gah lơh sơnơm ờ lời huĭ tŭ niam lơi sơm cau kòp in bulah dềt rơ hền ngan rlau jơh”. Thủ tướng đơs sùm, Ngai cau lơh sơnơm Việt Nam 27/02 là dơ̆ kuơmàng ngan nàng Cíñ phủ mờ jơh ală ai tơnggŏ bơta kah ưn ngài uă ngan tus jơh ală rơnàng lơh sơnơm, ală cau geh jơnau git wă jrô, cau kơlôi sơnơng jak chài, cau đơng lam broă mờ ală kwang bàng, cau lơh broă gah lơh sơnơm tài ală tă pơgồp dờng màng, kơ̆ dơn mờ ngềt ngơt ai broă lơh sền gàr, gròi sền mờ tơnguh niam pràn kơldang să jan làng bol.

Thủ tướng đơs nền, Đảng mờ Dà lơgar git nền sền gàr, gròi sền mờ tơnguh niam pràn kơldang să jan làng bol là kơnòl broă cíñ trị lài ngan, gàr bơta ai lài tàm ală broă rơndap lơh, gùng dà bơtàu tơnguh; là kơnòl bơh jơh gùt anih lơh broă cíñ trị, jơh gùt mpồl bơtiàn mờ tơl nă làng bol dê. Mut tus rài bơtàu tơnguh pa bơh dà lơgar dê, mờ jơnau kờñ ngai sơlơ tơnguh niam pràn kơldang jơh bal bè să jan mờ nùs nhơm, bơta jơnhua să jan, sơnam kis jŏ, bơta niam rài kis bơh cau Việt Nam dê, Thủ tướng sồr pơn jat tai lơh sir kơrnuat boh lam, gùng dà broă lơh mờ lam lơh jat geh cồng nha ală jơnau cih bơh adat boh lam dê bè lơh sơnơm; tơrgùm tơnguh pràn jak mpồl lơh sơnơm, ngan là mpồl lơh sơnơm rơcang gàr lài, lơh sơnơm ƀòn lơgar, ngui bơta pràn bơh lơh sơnơm bơhiàn yau dê. Rơndap tap sèng mpồl lơh sơnơm dipal, geh cồng nha, gàr bơta tơrbŏ bal đah ală kâp mờng chài. Lơh sir kơnòl broă, mpồl lơh broă bơh hìu sơnơm sàh dê.