Mho ngai 15/12, tàm Hà Nội, Thủ tướng ồng Phạm Minh Chính tus bal Dơ̆ tơngkah 50 nam ngai tơng gơs Anih duh broă Tiah nhàr dà lơgar mờ jàu Gai lòng Lơh broă khà dùl ai Mpồl cau Anih duh broă Tiah nhàr lơgar, Ƀộ Cribơyai broă mờ lơgar ndai in. Đơs tàm dơ̆ bơyai lơh, Thủ tướng đơs sùm tiah nhàr lơgar là rùp pơrya dờng màng ngan, gơ jat bal mờ ù tiah kis jŏ bơh jơi bơtiàn Việt Nam dê. Thủ tướng đơs nền broă lơh tiah nhàr lơgar là kơnòl kuơmàng ngan bơh jơh gùt Đảng, jơh gùt làng bol, jơh gùt ling klàng dê mờ jơnau đơs “tơl nă làng bol tiah nhàr lơgar là dùl nơm jrong kis”.

Ală cau lơh broă lơh tiah nhàr dà lơgar kờñ pal geh jơnau git wă jrô ơnàng bè kah yau, niam chài, git loh ù tiah ngan ngồn nàng bơsong di broă gơlik geh, sền gàr bơta kuơ dà lơgar tàm kơƀàng tàm bơyai mờ tàm ù tiah ngan ngồn. Thủ tướng sồr Anih duh broă Tiah nhàr dà lơgar pơn jat tai gàr uă ngan rlau jơh bơta kuơ dà lơgar – jơi bơtiàn, gàr kơ̆ lơngap lơngai is, gơnoar tờm, tơl làm kơnhoàl ù tiah, gàr sùm tiah ơm kis ring lơngai, kơnhăp kơ̆, bơt bơtàu gùng nhàr lơgar ring lơngai, lơh bơyô bal, lơh broă bal bơtàu tơnguh kơ̆ kơljap sùm.