Broă lơh dơ̆ sơnđờm mŭt lơh geh tơnggume “Việt Nam- Ring lơngai- Lơh broă bal- Bơtàu tơngguh” bal mờ rlau 2 rbô 400 nă kwang bàng, cau ling Mpồl ling klàng Làng bol Việt Nam tus bơh ală Mpồl ling Lơh kơnòl broă is ồn, Ling sền gàr tiah nhàr lơgar mờ Gùng đơs crih ling klàng dê lơh. Đơs tàm dơ̆ bơyai lơh, Thủ tướng ồng Phạm Minh Chính đơs sùm, Ràng tơlik Sền gàr dà lơgar Ală lơgar Việt Nam 2024 geh gơtha is ồn ngan, geh lơh di dơ̆ tơngkah kir sơnrai 80 nam Ngai tơnggơs Mpồl ling klàng Làng bol Việt Nam mờ 35 nam Ngai chờ jơh gùt làng bol sền gàr dà lơgar.

Do là broă lơh ală lơgar pơnrơ ngan bal mờ jơnau đơs “Ring lơngai- Lơh broă bal- Bơtàu tơngguh”, pơgồp bơnah chồl tơngguh lơh broă mờ lơgar ndai mờ lơh broă bal sền gàr dà lơgar tàm jơh ală broă; tài ring lơngai, kơ̆ kơl jăp, lơh broă bal mờ bơtàu tơngguh tàm kơnhoàl ù tiah do mờ tàm dunia. Việt Nam pơlam gùng broă rơndăp lơh bơtàu tơngguh rài broă lơh sa mờ măy mŏk sền gàr dà lơgar rơcăng lài, lơh tờm is, kơnòm tàm bơta pràn is, pa ngan mờ mŭt gơrờm bal mờ ală lơgar; mơkung tơngguh uă jơnau tơl pràn sền gàr dà lơgar, bơtàu tơngguh lơh sa, drơng bơta kwơ jŏ jòng bơh dà lơgar dê mờ ai rài kis ngan ngồn bơh làng bol dê in.