Drim ngai 29/12, Thủ tướng ồng Phạm Minh Chính neh đơng lam pơrjum Mpồl Sồr lơh bơh Cíñ phủ dê bè “tơn jơh lơh jat Jơnau lơh nền tàm pơrjum sồ 18”. Jat jơnau yal, broă lơh rơndăp tăp sèng mpồl lơh broă bơh ală anih lơh broă cíñ trị geh ală Ƀộ, anih lơh broă ndrờm mờ Ƀộ, anih lơh broă gơwèt Cíñ phủ lam lơh mhar, tus tŭ do sền bal lơh sir Ală jơnau neh lơh nền. Kờp dŭ mpồl cau lơh broă Cíñ phủ rơ̆p geh gơmù bơh 30 gơmù gam 21 tiah lơh broă bơh sơnrờp, geh 13 ƀộ, 4 anih lơh broă ndrờm mờ Ƀộ mờ 4 anih lơh broă gơwèt Cíñ phủ.

Tàm pơrjum, Mpồl Sồr lơh tơrgùm kờp sền ală broă lơh, tàm hơ̆ tơrgùm cribơyai bè broă tơn jơh tơngai lơh broă bơh Mpồl đơng lam Đảng Cíñ phủ mờ tơnggơs Đảng ƀộ Cíñ phủ gơwèt Dà lơgar. Đơs pơndŭt pơrjum, Thủ tướng Cíñ phủ ồng Phạm Minh Chính sồr pơn jat tai kờp sền, tam gơl pa, bơtơl jat gơlik geh ală bơta, jat tàm jơnau pal jat rơndăp tăp sèng mpồl lơh broă pal gàr tơl bơta niam, gơmù, pràn, lơh broă gơtùi mờ geh cồng nha; pơgồp bal mờ tơrmù cau lơh broă, tơnguh cồng nha lơh broă mpồl kông cứk, viên cứk dê. Is ồn, broă rơndăp tăp sèng mpồl lơh broă pal tơrmù tiah lơh broă, tơrmù broă lơh bơh sơnrờp, mơya ờ gŏ lời tàm rơndăp rơndồl, lời hŭi gonoar broă, kơnòl broă, gơnăp gơnoar dê.