Jat jơnau yal tàm pơrjum, tàm dơ̆ trồ tiah lơh aniai pa do, khà hìu ơm gơtìp tơrlah, tơrlơm pal lơh pa là 1 rơbô 597 nơm hìu, tus tŭ do neh lơh sir 671 nơm hìu, khà gam wơl gam mut lơh. Khà hìu gơtìp ờ diơng mờr 34 rơbô 800 nơm hìu, tŭ do neh lơh sir broă lơh niam wơl. Đơng lam bồ càr Dăk Lăk pà gĭt, tàm tơngai tus rơ̆p kờp sền wơl, lơh hìu mpồl bơtiàn drơng mờ dà tih dà lìu. Càr Gia Lai gam tơrgùm lơh 38 tiah ơm kis pa ai làng bol in, jơh nùs lơh ngan ntrờn làng bol tàm tiah gơtìp gơrềng tus tiah ơm pa lơngăp lơngai. Ƀộ Ling klàng neh hòi jà, ai 176 rơbô dơ̆ kwang bàng, cau ling, ling griăp ƀòn mờ gĭt nđờ rơbô dơ̆ rơndeh rơn dồ măi mok ală bơta pơgồp bal mờ gơnoar atbồ ală tiah dong kờl làng bol lơh hìu, lơh niam wơl hìu. Ƀộ Kwang àng neh hòi jà tă pơgồp rlau 11 rơbô dơ̆ kwang bàng, cau ling dong kờl làng bol bơsong jơnau gơ lời wơl tài bơh trồ tiah lơh aniai.

Tàm dar pơrjum, Thủ tướng ồng Phạm Minh Chính tơngŏ bơta chờ hờp tŭ “Broă lơh Quang Trung” tơnơ̆ 1 nhai lam lơh neh lơh sir 100% nơm hìu pal lơh niam wơl, di mờ jơnau kờñ geh ai. Thủ tướng sồr tơn lơyah tơngai mut lơh, pơnđơl pràn lơh ngan tus ngai 15/01/2026 pal lơh sir broă lơh wơl hìu gơtìp tơrlah, tơrlơm nàng làng bol in geh hìu ơm lài mờ bơyai lơh Pơrjum dờng cau ala mat gùt lơgar dơ̆ 14 bơh Đảng dê.