Mho ngai 24/09, tàm Hìu duh broă Cíñ phủ, Thủ tướng Cíñ phủ ồng Phạm Minh Chính đơng lam dar pơrjum dơ̆ 4 Mpồl Sồr lơh Cíñ phủ dê bè bơtàu tơngguh jak chài măy mŏk, tam gơl pa bơceh lơh mờ Ală jơnau neh lơh nền 06. Lơh jăt Jơnau lơh nền tàm pơrjum 57 Ƀộ Cíñ trị dê, tus tŭ do, jak chài măy mok, tam gơl pa bơceh lơh mờ tam gơl sồ geh bơta bơtàu tơngguh pràn kơldang. Nhai 08 pa do, Việt Nam geh Mpồl 10 dunia bè khà ngui Internet; 1/4 khà kờp làng bol geh pờ gùng 5G; sơnđờm ai ngui Anih tờm ală jơnau yal dà lơgar sồ 01; lơh ngui che internet tàm ù gờl jòng mờr 4 rbô kơi sồ tàm tơrbŏ mờ 5 dà lơgar. Gah lơh sa mờ măy mŏk măy mok sồ pơn jăt tai đơs nền gơnoar broă tờm tŭ 8 nhai do priă geh bơh kă bro geh rlau 3,2 tơlak tơmàn đong…

Tàm dar pơrjum, Thủ tướng ồng Phạm Minh Chính đơs loh, ală jơnau lơh nền tàm pơrjum Ƀộ Cíñ trị dê pa ai lơh jăt ndrờm gơrềng tus jak chài măy mŏk, tam gơl pa bơceh lơh, tam gơl sồ; den tàng bè hơ̆ pal tàm gơ jàr pah ngai, pah tŭ nàng ai jak chài măy mŏk, tam gơl pa bơceh lơh mờ tam gơl sồ mŭt tàm tơl broă lơh. Thủ tướng sồr mhar lơh sir ală jơnau yal tơnggĭt ală gah, ală kâp tàm nam do. Thủ tướng đơs wih đơs wơl nùs nhơm lam lơh sơrbac mhar, geh cồng nha, tam gơl pràn tơl làm; pal ai làng bol, mpồl lơh sa kă bro lơh anih tờm, cau tờm, gơn kơnờm, bơta pràn bơh bơtàu tơngguh dê. Bè lơh jăt gơnoar ătbồ ƀòn lơgar 2 kâp, Thủ tướng sồr tơrgùm lơh sir gơs tam gơl sồ, is ồn kâp hơđơm.