Thủ tướng sồr ală ƀộ, gah broă lơh dà lơgar, ală càr, ƀòn dờng jơh nùs, rơcang lài, ngac ngar, lơh geh cồng nha rlau tai tàm broă lam lơh broă, bơsong ală bơta gơ kòl, bơh bơta lơh jat nền nòn ală jơnau sồr lơh bơh Ƀộ Cíñ trị, Quôk hội, Cíñ phủ dê. Tàm hơ̆, lơh sir ală jơnau sồr pal jat bè bơta niam, broă rơndap lơh, jat tàm ală jơnau sồr pal jat ală lơgar dê mơya di mờ bơta krơi is bơh Việt Nam dê nàng geh bơnàng jă lam lơh ndrờm bal, ring bal tàm gùt lơgar. Lơh sir sră nggal bơcri priă, ai priă bơcri lơh jat jơnau sồr, tŭ tơngai hơ pơrgon, mờ kung kràñ cê kơryan sa kuề sa kuà, broă ờ niam, sa kuơ jat mpồl.

Thủ tướng sồr ală càr, ƀòn dờng tơrgùm sồr ai ù lơh rơndap broă lơh, rơndap ƀòn ơm kis pa, gàr bơta sơrbac mhar, di tŭ, rài kis làng bol tàm tiah ơm pa dê niam rlau mờ tiah ơm kis yau, gàr wil tơl phan bơna mpồl bơtiàn, sền gròi tus lơh broă, lơh sa bơh làng bol dê. Thủ tướng jàu Ƀộ Priă jền mhar sền sơ wì nền, yal kĭ ală jơnau lơh nền rơndap tap sèng wơl Tổng kông ty gùng rơndeh ồs Việt Nam; Ƀộ Lơh sa mờ măi mok mờ kă bro phan lơh sir sră pơ àr nàng yal kĭ ală jơnau lơh nền bơtàu tơnguh lơh mờ măi mok gùng rơndeh ồs tàm nhai 3 nam 2026, mờ kung pơn jat tai dan gùng dà, broă lơh mờ kâp geh gơnoar.