Thủ tướng jờng rơ uă ngan ală tă pơgồp jơh nùs bơh Kwang atbồ anih lơh broă ala mat lơgar ndai mờ ală Cau lam bồ anih lơh broă ala măt ală lơgar Asean tàm bơtàu tơnguh bơta gĭt gơ̆p đah Việt Nam mờ ală lơgar Asean. Thủ tướng đơs sùm Việt Nam sùm sền dờng màng mờ lời ai lài ngan ai bơta gĭt gơ̆p mờ ală lơgar rềp bal; hơ pơn jat tai tus bal jơh nùs, tă pơgồp rcang lài, ngan ngồn rlau tai ai lơh broă bal Asean.

Thủ tướng sồr ală Kwang atbồ anih lơh broă ala mat lơgar ndai, Cau lam bồ anih lơh broă ala măt ală lơgar Asean pơn jat tai tă pơgồp ngan ngồn ai bơta bơtàu tơnguh pràn kơl dang bơh bơta gĭt gơ̆p đah Việt Nam mờ ală lơgar Asean tàm tơngai tus. Sồr Asean lơh ngan lơh jrô ơnàng làm uă rlau tai bơta gĭt gơ̆p kă bro phan- bơcri priă tàm mpồl, ngui geh cồng nha bơta gơn kơnờm gơguh tai pa bè lơh sa sồ, jak chài măi mok, tam gơl pa bơceh lơh, sơlơ tơnguh tai tàm tơrbŏ bal tàm ală gah kwơ màng bè phan bơna bơt bơtàu, năng lượng...; lơh kơ̆ kơl jăp bơta gĭt gơ̆p ờs mờng, sơlơ tơnguh tai tìp mat lơh kwèng làng bol, tam klăc bal; broă bơt bơtàu  Mpồl Asean tơrgùm bal mờ kơ̆ kơl jăp, ai bơta kwơ bơh làng bol dê lơh gai was ai tơl broă lơh, broă lơh broă bal.