Tàm dơ̆ lơh broă, Thượng tướng ồng Đỗ Xuân Tụng sồr tơngai tus, Mpồl ling sền gàr tiah nhàr lơgar càr Dăk Lăk kờñ pal pơn jat tai rơcang lài git loh broă gơlik geh tàm ù tiah ƀòn lơgar, lam lơh ndrờm bal ală broă lơh sền gàr tiah nhàr lơgar, sơlơ rơcang lài kơryan ală bơta cau tìs tàm tiah nhàr lơgar, pơgồp bal jơh nùs bơh ală mpồl geh gơ rềng mờ mpồl sền gàr tiah nhàr lơgar lơgar Campuchia tàm atbồ, sền gàr tiah nhàr lơgar. 

Thượng tướng ồng Đỗ Xuân Tụng kung tơngkah mpồl ling sền gròi tus broă gàr lơngăp lơngai, niam ờdo ờdă tàm ală tŭ tơngai kuơmàng, ngan là tàm dơ̆ tĕ khà cau ala mat Quôk hội khoă XVI mờ cau ala mat Mpồl duh broă Làng bol bàr kâp, tơngai lơh broă bơh nam 2026 tus nam 2031; pơn jat tai lam lơh geh cồng nha ală broă lơh dong làng bol bơtàu tơnguh lơh sa – mpồl bơtiàn, lơh niam broă lơh crăp rơcang tam lơh, bơyai lơh ai cau ling mờ làng bol in wă rò sa tềp bơhiàn dà lơgar lơngăp lơngai, tềm pềr, tam klac bal, đềt mềr.