Là tiah sùm gơtìp bơh rềs àr trồ tiah, mìu càl dờng dà tih dà cò, đah Măt tơngai lik càr Gia Lai (càr Bình Định lài do) pa sơrlèt mờ mìu càl dờng sồ 13 mờ dơ̆ mìu dờng dà tih dà cò lơh aniai tàm lồi nam 2025, lơh hoàc huơr uă ngan tus mờ rài kis bal mờ lơh sa làng bol dê. Git nđờ rơhiang nơm hìu gơtìp tơrlah, git nđờ rơbô nơm hìu gơbam dà, git nđờ jơ̆t rơbô thơ̆t bơtơ̆t, dà dờng, croh dà gơtìp tơrlah mờ gơbồr ù, lơh gơbam dà bă ù tam phan.

Lài mờ Pơrjum dờng dơ̆ XIV Đảng dê, mò Huỳnh Khánh Ly, tàm thôn Luật Lễ, sàh Tuy Phước Đông, càr Gia Lai dan: "Pơrjum dờng Đảng dơ̆ do làng bol lơh broă sa suơn sre tàm tiah do kơ̆p kờñ geh Dà lơgar pơn jăt tai sền gròi tus tàm tiah thòng, tiah gơtìp dà tih dà cò. Gùt dar là poan geh dà dờng. Làng bol kung kờñ là bơtơ̆t geh lơh kơl jăp, gùng lòt ù gờl, rơbàng, gùng lòt ngai sơlơ ƀuơn nàng làng bol lơh sa bơtàu tơnguh”.

Kung ndrờm mờ jơnau kơ̆p kờñ hơ̆, ồng Nguyễn Thanh Dũng, Kwang Lam bồ Mpồl lơh broă bal Broă lơh sa suơn sre Phước Thuận, Gia Lai đơs là, jơnau phan bơna bơ̆t bơtàu kung gam là bơta tờm gơwèt mờ tiah gơtìp dà tih dà cò. “Tiah mờng gơtìp dà tih dà cò den tàng là bơta lơh bañ gơtìp dà tih kung kal ke ngan. Den tàng bơta bè phan bơna bơ̆t bơtàu den kung kơ̆p kờñ là Dà lơgar sền gròi: lài ngan là bơcri priă lơh phan bơna bè gùng lòt, dơ̆ bàr là bè bơtơ̆t rơbòng dà, lơh bañ gơtìp dà tih”.

Wèt tus Pơrjum dờng dơ̆ XIV Đảng dê, mò Tô Thị Thu Hường, Phó Ƀí thư Duh broă sùm Đảng ủy sơnah ƀòn Quy Nhơn tơlik nùs nhơm pin dờn là broă tam gơl tơlir mờ Đảng đơng lam bồ, rơ̆p di pal mờ jơnau kơ̆p kờñ dờng màng ngan bơh làng bol dê, bè dùl tơngu me tờm bơtàu tơnguh kơl jăp tềng đăp mờ rềs àr bơh trồ tiah, tam gơl nhơm trồ tiah. Bal mờ hơ̆, ală gùng dà broă lơh ndrờm bal bơh Pơrjum dờng, rơ̆p ai dà lơgar bơtàu tơnguh mhar tàm tơngai pa.

Bè đah Đảng ƀộ sơnah ƀòn, sùm lơh ngan pơrlòng lơh geh cồng nha chờ gờm pơrjum dờng: “Tơnơ̆ mờ ală bơta gơrềng ờ niam bơh mìu càl dờng, dà tih dà cò, Quy Nhơn neh rơhời brồ guh wèt tus Pơrjum dờng Đảng dơ̆ XIV. Tàm nùs nhơm àng gơcrà bồng bi, bơkào bal mờ rùp să ù tiah geh is neh lơh geh bơta niam bơnĕ ngan, neh rơcang nền nòn nàng lơh jăt niam ală kơnòl broă geh jào. Làng bol sơnah ƀòn Quy Nhơn gam wèt nùs nhơm tus Pơrjum dờng mờ nùs nhơm pin dờn bal mờ kơ̆p gơn uă ngan tàm ală gùng dà broă lơh kwơ màng pa bơh Đảng dê”.

Gơtùi gŏ, bơh tàm mùl màl gơtìp kal ke bơh tiah mờng gơtìp dà tih dà cò Đah măt tơngai lik càr Gia Lai dê, ală jơnau đơs, jơnau dan, jơnau kơ̆p kờñ bơh làng bol bal mờ ƀòn lơgar dê ndrờm tơrgùm tàm jơnau kờñ jal mhar bè phan bơna geh lơh kơl jăp, gơdờp mờ rềs àr bal mờ tam gơl bơh nhơm trồ tiah. Wèt tus Pơrjum dờng cau ala măt gùt lơgar dơ̆ XIV Đảng dê, nùs nhơm pin dờn mờ kơ̆p gơn bơh Làng bol dê geh pơyoa tus tàm kơrnoăt kwơ màng, jŏ jòng, ai kòn bơnus lơh tờm, ai bơta lơngăp lơngai, rài kis broă lơh broă sa mờ bơtàu tơnguh kơl jăp lơh tơngu me jŏ jòng.