Tềng hìu lơh broă thôn Phan Dũng, sàh Tuy Phong sră lir khà măt cau tĕ khà mờ cau tơlik măt tĕ khà cau ala măt Quốk hội khoă XVI mờ Mpồl duh broă Làng bol ală kấp tơngai lơh broă bơh nam 2026 tus 2031 sùm geh gal làng bol tus sền. Ồng Mang Nhu, kòn cau Rơglai, tàm ƀòn Phan Dũng pà git, tàm ală ngai do kwang bàng thôn sùm tus tơl hìu làng bol nàng yal bè dơ̆ tĕ khà, bơto sồr làng bol sền nàng git ală cau tơlik măt tĕ khà mờ sền khà măt cau tĕ khà, rơcang tus bal lòt đùh sră. “Tơl nă làng bol geh gơnoar rơwah ală cau ala măt, den tàng pal pồ bè lơi nàng di cau. Là cau tĕ khà, cau lơi kung kơ̆p kờñ ală cau ala măt tơnơ̆ do di lah geh pồ den sền gròi uă rơlao tai tus mờ jơnau kơ̆p kờñ bơh làng bol dê, sền gròi nàng geh rài kis hờm ram, gơboh gơbài. Añ gŏ làng bol cau lơi kung cri bơyai, pơlam oh kòn cau lơi tờm 18 sơnam rơlao hờ đang pal lòt đùh sră”.

Ồng Mang Hiếu, Kwang atbồ thôn Phan Dũng pà git, thôn Phan Dũng geh gal làng bol kòn cau Rơglai, gơwèt mpồl tĕ khà sồ 05 tàm sàh Tuy Phong, càr Lâm Đồng dê. Tàm thôn geh 663 nă cau tĕ khà mờ ală cau tĕ khà ndrờm neh geh yal bè ngai tĕ khà. “Nàng làng bol in git loh làng rơlao bè ngai 15 nhai 3 là ngai gùt làng bol lòt đùh sră den tŭ do thôn kung neh pơgồp bal mờ Mặt trận nàng mblàng yal tàm Zalo mpồl thôn dê kung bè tàm fanpage bơh Mpồl Làng bol lơh broă sa suơn sre dê. Bơh tŭ hơ̆ nàng mblàng yal ai làng bol in git nàng ngai hơ̆ là lòt tĕ khà, pơyoa jơnau kơ̆p kờñ bơh să tờm dê tus mờ ală cau tơlik măt tĕ khà in”.

Tàm sàh Bắc Bình, càr Lâm Đồng, broă rơcang ai ngai chờ dờng kung neh geh lơh sir. Lòt gan tàm ală thôn mìng geh làng bol kòn cau Prum tàm sàh Bắc Bình ơm kis, tàm tiah lơi kung kơno loa mblàng yal bè dơ̆ tĕ khà. Ờ mìng mblàng yal bơh tàm loa, ală mpồl tĕ khà gam tus tơn pơgồp bal mờ Cau geh bơngă pin dờn, cau kơ đơng yàng tàm mpồl bơtiàn kòn cau Prum tus tơl hìu làng bol nàng lam sồr, mblàng yal ai làng bol in git loh bơta kwơ bơh dơ̆ tĕ khà dê.

Cau kơ đơng yàng Huỳnh Cứng, dùl nă cau kơ đơng yàng kòn cau Prum tàm thôn Bình Tiến, sàh Bắc Bình pà git: bơh broă mblàng yal, làng bol kòn cau Prum git loh làng tĕ khà ờ mìng là gơnoar kwơ mờ gam là kơnòl bơh tơl nă cau tĕ khà dê. Bơh tŭ hơ̆, lơh geh uă nùs nhơm chờ hờp, pin dờn nàng ngai tĕ khà (15/03) tus mùl màl là ngai chờ bơh gùt làng bol dê. “Ală ngai do thôn mblàng yal nền nòn bè broă tĕ khà, tàm gùng lòt kung yồng ƀăng rôn, jơnau sồr, bồng bi dà lơgar, bồng bi jòng nàng dờp bal ngai tĕ khà. Să tờm añ là cau kơ đơng yàng, añ kung mblàng yal lài jơh là tus mờ cau pròc mhàm să tờm añ dê kah tus ngai lòt đùh sră mờ rơwah ală cau geh nùs nhơm niam, jăk chài, nàng tơnơ̆ do tŭ geh pồ den pal lơh di mờ jơnau hơ bơh să tờm dê bè lài do, pơgồp bal tàm broă bơ̆t bơtàu ƀòn lơgar in”.

Mò Nguyễn Thị Vân Khánh, Phó Ƀí thư duh broă sùm, Củ tịc Anih duh broă tĕ khà sàh Bắc Bình pà git, gùt sàh geh rơlao 36 rơbô 400 nă cau tĕ khà. Nàng rơcang ai dơ̆ tĕ khà cau ala măt Quốk hội khoă XVI mờ Mpồl duh broă Làng bol ală kấp tơngai lơh broă bơh nam 2026 tus 2031, gơnoar atbồ sàh neh mhar lơh jăt ndrờm bal ală kơnòl broă lơh ngan uă, tàm hơ̆ uă ngan là broă mblàng yal. “Broă mblàng yal pal geh sền kwơ, tàm hơ̆ uă ngan là tàm tiah làng bol jơi bơtiàn ờ gal cau. Mờ jăt mờ hơ̆, bol añ pơgồp bal broă mblàng yal nàng yal mờ tam pà bal ală broă gơrềng tus mờ broă tĕ khà. Tơngai mờ kấp hờ đang sồr bol añ kung lơh geh di mờ jơnau geh ai bal, lơh ală tơngu me gơrềng bal tus mờ broă tĕ khà. Mờ bol añ pin dờn ngai 15 nhai 3 mùl màl là ngai chờ bơh gùt làng bol dê”.

Kung bè sàh Bắc Bình, sàh Tuy Phong pa geh crơng gơs geh bă ù tiah ơnàng, làng bol ơm kis rah rài, rài kis làng bol gam uă kal ke, den tàng broă rơcang tĕ khà pal geh lơh nền nòn. Ồng Trần Di Hậu, Phó Củ tịc Anih duh broă Làng bol sàh Tuy Phong, càr Lâm Đồng pà git, kờp jơh cau tĕ khà tàm sàh dê là 6 rơbô 616 nă tàm 9 rơbô 751 nă làng bol. Tàm sàh geh 2 tiah đùh sră geh gal làng bol jơi bơtiàn ờ gal cau là thôn Phan Dũng mờ thôn Tuy Tịnh 2. Tus tŭ do, broă mblàng yal geh sàh lơh mờ uă broă lơh pơgồp di pal. “Tơnơ̆ mờ tŭ dờp geh khà măt ală cau tơlik măt tĕ khà, sàh kung neh sồr lơh geh dùl jơnau mblàng yal bè broă yal tơrgùm bơh tơl nă cau ala măt nàng pờ tơlik jơnau đơs tàm loa sàh, hơ̆ sồng tàm ală pang fanpage. Mờ bơh tŭ do tus tàm ngai 15 nhai 3, ală tiah gal làng bol ơm bè: hìu bơsram, ală drà den rơ̆p lơh nàng geh tai ală jơnau mblàng yal mờ ală pano nàng làng bol in git loh làng rơlao tai bè bơta kwơ màng bơh dơ̆ tĕ khà dê”.

Ală dơ̆ pơrjum tìp mờ cau tĕ khà mờ ală cau tơlik măt tĕ khà, ală jơnau đơs mblàng yal ai ngai tĕ khà in, săp loa pờ tơlik jơnau đơs mpong sùm pah ngai… jơh ală broă gam lơh geh nùs nhơm chờ hờp lài mờ ngai tĕ khà tàm tiah làng bol kòn cau Prum mờ Rơglai dê.