Tơnơ̆ dơ̆ dà tiah dà lìu dờng ngan kềng gah dà dờng Dà Nhim, bi Nguyễn Quốc Bảo ơm tàm sàh Đơn Dương, càr Lâm Đồng kung gam ờ hềt jơh rơngòt sơl. Hìu krơh ơnàng 4 sàu kờp priă rlau 1 tơmàn 600 tơlak đong hìu bơnhă bi dê neh gơtìp dà tih cò pơr dô. Bi moat jrùm đơs: “Dà kơl hề, nùs nhơm, git nđờ priă jền he dê neh bơcri jơh tàm do den tŭ do he ờ gam tai priă nàng lơh wơl, tam wơl phan. Tŭ do mờ lơh wơl den he pal tuh wơl ù, hoàc uă ngan priă jền”.

Ală hìu bơnhă tam biap jat broă lơh ờs mờng jat kềng gah dà dờng Dà Nhim kung gam pơn đơl brồ guh wơl tơnơ̆ dơ̆ dà tih dà lìu dờng. Bulah pŏ ù jơh dùl ƀùi drim den hơ̆ sồng tờ bàn geh nđờ jơt hơk ding ƀồm dà, bi Hồ Việt Linh ơm tàm thôn Tân Lập 1, sàh Ka Đô pà git, rlau 6 sàu sơ lác hìu bơnhă dê mờ tơnhàu neh gơtìp dà cò pơrdô jơh. Ù bràs tŭ do bồr jrô geh tiah tus git nđờ thơk. Lơh wơl tam phan den ờ mìng hoàc uă dà kơl hề mờ gam hoàc priă jền bơcri tai: “Geh tiah den roh jơh, geh tiah den gơ bồr jơh. Tŭ do pal lơh wơl jơh lơm. Bơta lơi gam jơngkah wơl den he ngui, ai bơta lơi ờ diơng den he pal tam gơl wơl. Tŭ do pal ala ƀép, tam gơl che. Ù den ờ hềt gơtùi lơh, tài pal kơp trồ tơngai rơ sơh den hơ̆ sồng gơtùi lơh wơl”.

Lề jơh là bàr akhar đơs di ngan rlau jơh ai tiah tam uă biap, kơnuh, plai chi kềng gah dà dờng Dà Nhim jŏ jòng gan ală sàh: D’Ran, Ka Đô, Đơn Dương, Quảng Lập bơh càr Lâm Đồng dê. Bal mờ bă ù tam ală bơta biap gam tơnhàu, hoàc huơr kơn jơ̆ ngan rlau gơ wèt mờ cau tam biap ngui măi mok pa tàm tiah do tài ală hìu jàl, hìu krơh mờ priă bơcri lơh ai 1 sàu in gơguh tus git nđờ rhiang tơlak đong.

Tềng đap hoac huơr bơh cau tam biap dê, gah broă lơh sa suơn sre mờ gơnoar atbồ ală sàh tam uă biap bơh càr Lâm Đồng dê nah lam lơh broă lơh dong kờl bơto pơlam broă lơh sa suơn sre, ai càn priă drơng lơh sa suơn sre in nàng dong làng bol pơn đơl brồ guh, lơh wơl broă tam phan. Ồng Trần Hùng Dũng, Củ tịc Anih duh broă Làng bol sàh Đơn Dương, càr Lâm Đồng pà git: “Tềng đap mat den sàh pơn jat tai hòi jà làng bol crăp rơcang lơh niam wơl bă ù gơtìp gơ rềng tàm dơ̆ dà tih dà lìu pa do mờ rơp kờp dŭ wơl bơta chi tam lơi gơ in dipal. Is ồn nàng drơng ai sa tềp bơhiàn yau dà lơgar dê in den rơp sac rơ wah ală bơta chi tam, ală bơta biap lơyah ngai nàng di tŭ drơng sa tềp bơhiàn yau dà lơgar in. Bè jŏ jòng den rơp pơn jat tai lơh niam wơl mờ geh gùng dà bơtàu tơnguh jŏ jòng den pal geh broă rơndap lơh mùl màl mờ rơp hòi jà ală bơnah priă jền ndai nàng dong bơtàu tơnguh wơl tiah tam uă biap bơh sàh Đơn Dương dê”.