Boh bơr đềt mềr mờ gal kwang bàng, cau pơgru, cau bơsram dờng, cau ling tàm Hìu bơsram, Tổng Ƀí thư ồng Tô Lâm jờng rơ ală cồng nha bơh Hìu bơsram Kơlôi sơnơng Bơta chài ling klàng tàm mờr 60 nam do, geh pơnrơ ngan là neh bơto ai Ling klàng bal mờ dà lơgar in mpồl cau lơh broă jăk chài gơwèt uă gah broă, mờ rơlao 200 nă Tiến sìh, 1 rơbô 500 nă thạc sìh, 3 rơbô nă cau chài ling klàng mờ broă làng bol.

Tŭ do Hìu bơsram gam pơn jăt tai bơto rơlao 6 rơbô nă cau bơsram dờng. Tơnơ̆ mờ tŭ mblàng bè bơta tàm lơgar mờ ală lơgar, Tổng Ƀí thư đơs loh, Jơnau lơh nền tàm Pơrjum dờng dơ̆ XIV Đảng dê ai geh: Bơ̆t bơtàu Ling klàng làng bol kăc màng, jăk chài, ngăc ngar, lơh pa tơn tàm tơngai lơh broă bơh nam 2025 tus 2030, den tàng, mờ broă bơto cau lơh broă geh bơta jăk uă, Hìu bơsram pal tơrgùm lơh 5 gùng dà broă lơh kwơ màng di pal mờ jơnau kờñ kơnòl broă tàm bơta pa. tàm hơ̆ pal gơl pa pràn kơl dang tơngu me, broă bơto jăt gùng dà broă lơh pa, mùl màl mờ pơn jăt bal, pơgồp bal nền nòn mờ tàm bơta mùl màl, lơh pràn broă tơrgùm bal mờ ală lơgar. Tổng Ƀí thư sồr, Hìu bơsram lơh pràn broă tam gơl sồ; bơ̆t bơtàu gơs hìu bơsram đại họk kơlôi sơnơng tờm dà lơgar dê, lơh gơnoar tề lam tàm ală gah broă kơlôi sơnơng bơta chài ling klàng, là tiah tờm tam gơl pa bơceh lơh lài ngan dà lơgar dê.