Ƀí thư dơ̆ dùl, Củ tịc lơgar Cuba ồng Miguel Diaz Canel nting bơr gờm chờ Đảng he dê neh bơyai lơh geh cồng nha Pơrjum dờng Đảng dơ̆ XIV, nting bơr gờm chờ Mpồl duh broă Đảng dà lơgar, Ƀộ Cíñ trị mờ să tờm Tổng Ƀí thư ồng Tô Lâm neh geh Pơrjum dờng pin dờn pồ tàm ală gơnoar broă đơng lam tàm tơngai lơh broă pa.

Tổng Ƀí thư ồng Tô Lâm đơs nền, Pơrjum dờng dơ̆ XIV bơh Đảng dê neh lơh geh cồng nha niam bơnĕ, lơh gơs kơnòl kah yau dờng màng ngan. Pơrjum dờng neh tơn jơh broă lơh jat Jơnau lơh nền tàm Pơrjum dờng dơ̆ XIII, sền sơ wì 40 nam tam gơl pa mờ cồng nha lam lơh jat Jơnau pal jat, broă rơndap lơh bơtàu tơnguh lơh sa mpồl bơtiàn, ai tơlik ală jơnau kờñ, broă rơndap lơh, gùng dà broă lơh, kơnòl broă ai 5 nam tus in, lơh nền ală broă cèng bơta kuơmàng gơ wèt mờ tơnơ̆ do mờ bơta kis chơt bơh jơi bơtiàn Việt Nam dê tàm rài bơtàu tơnguh pa. Tổng Ƀí thư ồng Tô Lâm đơs nền, Việt Nam sền dờng màng ngan bơta git gơp lơh bơyô is ồn, niam bơnĕ mờ Cuba, crăp rơcang lơh jơh ală bơta lơi gơtùi nàng ngai sơlơ gàr kơ̆ bơta tam klac bal ờs mờng, rề ơnàng, tơnguh cồng nha lơh broă bal 2 gah, tài bơta kuơ bơh làng bol 2 lơgar dê, tài ring lơngai, lơh broă bal mờ bơtàu tơnguh tàm tơl tiah mờ tàm dunia.