Đơs tơn jơh dar pơrjum, Tổng Ƀí thư ồng Tô Lâm đơs nền cồng nha lơh jat Jơnau lơh nền tàm pơrjum sồ 66 tàm tơngai lài neh lơh gơlik ală bơta tam gơl loh làng ngan mờ uă tơngume tam gơl pràn tàm broă lơh bơt bơtàu, lơh sir adăt, kơrnoăt  boh lam, lơh jat jơnau sồr bơtàu tơnguh dà lơgar. Tổng Ƀí thư sồr, Anih duh broă Đảng Quôk hội, Anih duh broă Đảng Cíñ phủ, ală mpồl, ƀộ, gah broă lơh tàm dà lơgar mờ ƀòn lơgar pơn jat tai pơlam lơh jat tơl làm jơnau kờñ, jơnau sồr, kơnòl broă neh ai tơlik tàm jơnau lơh nền tàm pơrjum. Đơs loh, nam 2026 là nam kuơmàng ngan – nam sơn rờp lam lơh jat Jơnau lơh nền tàm pơrjum dờng Đảng dơ̆ XIV mờ nùs nhơm ai Jơnau lơh nền tàm pơrjum lơh jat ngan ngồn tàm rài kis, ờ gŏ di lơyài, Tổng Ƀí thư sồr, tơrgùm tàm 3 broă, hơ̆ là kờp sền mpồl lơh broă mơ tơn, ală jơnau đơs, jơnau lơh nền dờng tàm sră nggal Pơrjum dờng dơ̆ XIV; mhar lơh gơs ală sră nggal nàng lơh jat 51 adat boh lam mờ 8 jơnau lơh nền tàm pơrjum pơlam lơh jat pa geh Dơ̆ pơrjum dơ̆ 10, Quôk hội khoă XV ring bal, ờ lời lơyài ală sră nggal pơlam mờ ală bơta pal geh nàng lơh jat ngan ngồn mờ tơrgùm tă bơsong mhar ngan rlau jơh ală bơta kal ke, bơta gơ kòl bè adat boh lam, ờ lời gơ kơryan bơta bơtàu tơnguh; bơsong 317 jơnau đơs, jơnau yal, jơnau dan geh kal ke, gơ kòl tàm nam 2026 jat broă rơndap lơh, tŭ tơngai neh geh git nền; rơcang lài bơsong ală jơnau đơs, jơnau dan, jơnau yal pa gơlik geh bơh tàm ngan ngồn.