Đơs pơn dŭt dơ̆ lơh broă, Tổng Ƀí thư dùl dơ̆ tai đơs nền, gùng dà broă lơh gơwèt mờ cau geh màng mờ dà lơgar; broă jòi rồ, tơrgùm mờ đal git măt cau chơ̆t màng là kơnòl broă cíñ trị kwơ màng ngan, geh bơta kwơ màng uă ngan bè bơta niam, rài lài do mờ bơta niam kòn bơnus dê; là bơta was kơnòl broă bơh Đảng, Dà lơgar gơwèt mờ ală cau neh phi să tài bơta krơi is, khăt gơboh Dà lơgar in.

Tổng Ƀí thư sồr Đảng ủy Cíñ phủ sồr mhar sền wơl, tam gơl, bơtơl broă lơh, adăt boh lam bè cau geh màng, tàm hơ̆ uă ngan là ală jơnau gam gơkòl tàm broă dờp cau chơ̆t màng gơwèt mờ cau ling sồt să chơ̆t tài sồt să gơtìp wơl; dờp cau phi să tŭ lơh kơnòl broă ndơ̆p ndơr; ală sră nggal ờ gam di pal tàm mùl màl, jŏ jòng, lơh gơs broă bơsong ală broă gam gơlời bè broă dong kờl cau geh màng tàm nam 2026.