Jăt jơnau yal tàm dơ̆ pơrjum, lơh jăt Jơnau sồr sồ 55 bơh Mpồl Đơng lam Đảng Dà lơgar, Ƀộ Cíñ trị, Mpồl Đơng lam Đảng Dà lơgar, Cíñ phủ rơcang sồr gờñ broă bơyai lơh Satềp nam Ơseh 2026 mờ sùm sồr lơh, lam lơh jăt.

Jơnau đơs pơn dŭt dơ̆ pơrjum, Tổng Ƀí thư ồng Tô Lâm jờng rơ nùs nhơm geh kơnòl bơh ală kấp ủy, mpồl Đảng, gơnoar atbồ, Mặt trận Dà lơgar, mpồl ling bơh mpồl kwang bàng, kông cứk, viên cứk, cau lơh broă neh bơyai lơh jăt nền nòn jơnau sồr bơh Mpồl Đơng lam Đảng Dà lơgar, gàr niam ai làng bol in wă rò Satềp chờ hờp, hờm ram, lơngăp lơngai, ai geh nùs nhơm pràn kơl dang niam bơnĕ mŭt tàm nam pa. Mơya, kơnòl broă tềng đăp măt kal ke ngan, Tổng ƀí thư sồr jơh mpồl lơh broă cíñ trị pal at tê mơ mŭt lơh broă. Mìng is tàm quý I nam do, Tổng Ƀí thư sồr, pal lơh gơs broă lơh jăt lài kung bè tơnơ̆ mờ lơh jăt broă lơh, bơtơl Broă lơh lơh jăt Jơnau lơh nền tàm Pơrjum dờng dơ̆ XIV tàm gùt Đảng; bơyai lơh geh cồng nha tĕ khà cau ala măt Quốk hội khoă XVI, Mpồl duh broă làng bol ală kấp tơngai lơh broă bơh nam 2026 tus 2031 tàm ngai 15 nhai 3 tus.