Tơnơ̆ dơ̆ wă, Tổng Ƀí thư ồng Tô Lâm mờ Tổng Ƀí thư, Củ tịc lơgar Lào ồng Thongloun Sisoulith lam bồ mpồl kwang bàng kấp dờng 2 lơgar lơh dơ̆ pơrjum bơyai, tàm cribơyai ală pơlam gùng mờ broă lơh bơsong nàng kờñ pơn jat tai sơlơ tơnguh bơta gĭt gơ̆p lơh broă bal Việt Nam mờ Lào bơtàu tơnguh tus gơnoar broă pa tàm tơngai tus.

 Đơs sơn rờp dơ̆ pơrjum bơyai, Tổng Ƀí thư ồng Tô Lâm đơs nền Đảng, Dà lơgar mờ làng bol Việt Nam jơh nùs chờ hờp, brơn  brài wă rò Tổng Ƀí thư, Củ tịc lơgar Lào bal mờ pơ ùr mờ Mpồl kwang bàng kấp dờng còp kấp Dà lơgar tus Việt Nam; đơs sùm do là kwang đơng lam bồ lơgar ndai sơn rờp còp lơgar Việt Nam tơnơ̆ tŭ Pơrjum dờng cau ala mat gùt lơgar dơ̆ 14 bơh Đảng Kộng sản Việt Nam, tơngŏ bơta sền dờng màng jrô ơnàng làm uă mờ nùs nhơm is ồn bơh Đảng, Dà lơgar Lào kung bè să tờm Tổng Ƀí thư, Củ tịc lơgar Lào dê gơwèt mờ Việt Nam. Bè đah he, Tổng Ƀí thư, Củ tịc lơgar Lào ồng Thongloun Sisoulith gờm chờ geh cồng nha Pơrjum dờng dơ̆ 14 Đảng Kộng sản Việt Nam dê, mơkung gờm chờ Tổng Ƀí thư ồng Tô Lâm pơn jat tai geh Pơrjum dờng pin dờn pồ at gơnoar broă Tổng Ƀí thư Mpồl duh broă Đảng dà lơgar khoă 14.