Tổng Ƀí thư đơs sùm, bơh bơta tơn jơh, tàm pơn jat tai ală tơngume dipal bơh Jơnau lơh nền tàm pơrjum mờ jơnau sồr lài do dê; pơn jat tai kơlôi sơnơng bơ tơl ală gùng dà broă lơh pa, tơngume pa, jơnau cih pa gơ in dipal mờ bơta geh ngan. Pal ơn broă lơh sền sơ wì, jat sền mờ lơh jat jơnau pal jat Đảng dê tàm jơh ală broă lơh bơt bơtàu Đảng, tơnguh bơta đơng lam broă dà lơgar mờ lam lơh ală jơnau kờñ kuơmàng bơtàu tơnguh dà lơgar ai tơlik tàm Pơrjum dờng dơ̆ XIV bơh Đảng dê.

Git nền, sền sơ wì, jat sền ờ mìng là broă lơh đơng lam kuơmàng bơh Đảng dê mờ gam là gùng dà broă lơh nàng Đảng lơh niam is, sền gàr is, lơh sir is, tơnguh niam is; là phan nàng gròi sền gơnăp gơnoar, gàr kơ̆ bơta duh rơngòt adat boh lam; là bơta nàng gàr gùng dà di ngan bơh Đảng dê geh lơh jat jơh nùs mờ geh cồng nha tàm ngan ngồn. Bè ală tơngume mùl màl bơh jơnau lơh nền tàm pơrjum mờ jơnau sồr dê, Tổng Ƀí thư sồr, tam gơl pràn broă lơh sền sơ wì, jat sền gơ gơs jơnau kờñ rơcang lài kơryan bơh gờñ, bơh ngài, gròi sền gơnăp gơnoar tàm tŭ ngui tơn, git gŏ jơnau pơhìn lài mờ tŭ gơ gơs broă lơh tìs. Rề ơnàng jat sền, gàr jơh ală gùng dà, broă lơh, jơnau lơh nền, bơta dơng kờl bơh Đảng dê geh lam lơh nền nòn, geh cồng nha.