Mho ngai 29/12, tàm Hà Nội, Tổng Ƀí thư ồng Tô Lâm tus còp mờ đơng lam dơ̆ lơh broă mờ Anih tờm Ală jơnau yal tơnggĭt dà lơgar sồ 01. Geh tơnggơs bơh bồ nam do, tŭ do Anih tờm Ală jơnau yal tơnggĭt dà lơgar sồ 01 neh lơh sir ndrờm bal khà uă ală jơnau yal tơnggĭt drơng broă ătbồ dà lơgar mờ bơtàu tơngguh lơh sa – mpồl bơtiàn. Mpồl drơng broă sa priă bal dà lơgar gam geh lơh broă tơrgùm bal jăt gùng dà gơgơs “anih dùl mpồng sồ tơrgùm bal mìng dùl lơm”, dong lơh ƀươn soh sră nggal jăt tàm ală jơnau yal tơnggĭt neh geh lài…Tàm dơ̆ lơh broă, Tổng Ƀí thư ồng Tô Lâm jờng rơ ală cồng nha, broă lơh geh mờ Ƀộ Kwang àng, ală Ƀộ, gah gơrềng bal mờ jơh ală kwang bàng, cau ling tàm Anih tờm Ală jơnau yal tơnggĭt dà lơgar neh lơh geh tơngai lài.

Tổng Ƀí thư kung ai gĭt loh, 3 kal ke dờng ngan kung là 3 “anih gơkòl” kờñ pal lơh ngan sơrlèt gan: hơ̆ là ală broă bè bơta niam ală jơnau yal tơnggĭt; ală mpồl lơh broă tam gơl pa bơceh lơh jăt tàm ală jơnau yal tơnggĭt; khà rơcăng lài is bè măy mŏk tờm mờ cau lơh broă geh broă lơh jak ngan gam ờ hềt uă. Tổng Ƀí thư sồr, Anih tờm Ală jơnau yal tơnggĭt dà lơgar kơlôi sơnơng bơsram mờ lam lơh jăt niam 5 pơlam gùng dờng, tàm hơ̆ tơrgùm bơ̆t bơtàu Anih tờm mùl màl gơs “plai nùs” bơh rài lơh sa ală jơnau yal tơnggĭt, mpồl bơtiàn ală jơnau yal tơnggĭt dê; là “tơngoh” drơng broă tơn, geh cồng nha broă lơh đơng lam, sồr lơh đơng lam lơh jăt Đảng, Dà lơgar mờ lơh broă bơh jơh gùt mpồl bơtiàn dê.