Tàm dơ̆ lơh broă, ală cau ala mat neh tơrgùm cribơyai ală broă lơh ai tơlik lài gùng dà lơh 2 Jơnau lơh nền tàm pơrjum kuơmàng bơh Đảng dà lơgar dê hơ̆ là Jơnau lơh nền tàm pơrjum bè tam gơl pa broă lơh bơtàu tơnguh dà lơgar jat tàm jak chài măi mok, tam gơl pa bơceh lơh, tam gơl sồ mờ Jơnau lơh nền tàm pơrjum bè ală broă lơh kuơmàng nàng chồl tơnguh gơguh lơh sa 2 nơm sồ gơ jat bal mờ lơh gơs broă lơh gơguh lơh sa pa. Do ndrờm là ală broă kuơmàng, dờng màng mờ jal mhar, kờñ pal rơcang gờñ nàng lam lơh mơ tơn Jơnau lơh nền tàm pơrjum dờng Đảng gùt lơgar dơ̆ 14 mờr tus.

Tổng Ƀí thư đơs niam ală cồng nha kơlôi sơnơng bơh chờm bơh Mpồl Gùng dà broă lơh mờ Broă rơndap lơh dà lơgar dê là tơl làm, mờ kung ai tơlik lài bàr pe jơnau sồr mờ kơnòl broă tàm tơngai tus tàm broă lơh 2 Jơnau lơh nền tàm pơrjum do. Tổng Ƀí thư đơs là, do là gùng pal lơh nàng lam lơh ngan ngồn 2 jơnau kờñ 100 nam bơh dà lơgar dê, bơt bơtàu dùl Dà lơgar Việt Nam ring lơngai, lơngăp lơngai is, làng bol lơh tờm, pas pràn, bơtàu tơnguh, gơguh jak, gơboh gơbài; tơl broă lơh nền bè bơtàu tơnguh ndrờm pal ơn tàm jơh ală bơta do.