Tổng Ƀí thư ồng Tô Lâm pà git, jat tơngume lơh broă, Mpồl sền swì sồ 10 lơh broă mờ Mpồl lơh kơnòl broă sùm Thàñ ủy ƀòn dờng Hà Nội bè 3 tơngume: ring bal jơnau yal cồng nha sền swì, jat sền dơ̆ 1 bè bơta đơng lam, sồr lơh tàm bơsram, lơh jat Jơnau lơh nền tàm pơrjum dờng dơ̆ XIV bơh Đảng dê, Jơnau lơh nền tàm pơrjum dờng Đảng ƀộ ƀòn dờng, is ồn là ală broă lơh jơh gùt khoă; broă lơh tĕ khà Quôk hội khoă XVI mờ Mpồl duh broă Làng bol ală kâp, tơngai lơh broă bơh nam 2026 tus nam 2031; sền sơ wì bơh chờm broă lam lơh jat jơnau kờñ gơguh lơh sa 2 khà, lam lơh gơnoar atbồ ƀòn lơgar 2 kâp mờ lơh jat Jơnau lơh nền tàm pơrjum sồ 57 bè tam gơl pràn bơtàu tơnguh kơlôi sơnơng, jak chài măi mok, tam gơl pa bơceh lơh.

Tổng Ƀí thư đơs sùm, tàm Pơrjum rơp pơn dut dơ̆ 1; mờ kung bơsram jơnau pơn dut bơh Ƀộ Cíñ trị dê bè sền sơ wì dut ndơl cồng nha jat sền dơ̆ 1 tàm gùt lơgar mờ ală kơnòl broă kờñ pal tơrgùm đơng lam, lam lơh tàm tơngai tus; bơh hơ̆ tam gơl broă rơndap lơh sền swì, jat sền dơ̆ 1.