Drim ngai 2/3, tàm Hìu lơh broă Đảng Dà lơgar, Tổng Ƀí thư ồng Tô Lâm đơng lam dơ̆ lơh broă mờ Mpồl Pơgồp jơnau đơs mờ Dong broă Dà lơgar mờ bàr pe anih lơh broă geh gơrềng nàng iăt mờ tă pơgồp jơnau đơs bè Ală jơnau neh lơh nền “Tơn jơh 20 nam lơh jat Jơnau lơh nền tàm pơrjum Dà lơgar 3 khoă 10 bè sơlơ tơnguh tai bơta đơng lam bơh Đảng dê gơwèt mờ broă lơh rcang lài kơryan sa kuề sa kuà, pơhì pơhà; yal mờ Mpồl duh broă Dà lơgar in sền sơ wì, ai lơh jat Jơnau lơh nền tàm pơrjum bè broă lơh rcang lài kơryan sa kuề sa kuà, pơhì pơhà mờ bơta ờ niam tàm tơngai pa”.

Đơs pơndŭt tàm dơ̆ lơh broă, Tổng Ƀí thư ồng Tô Lâm đơs sùm, rcang lài kơryan sa kuề sa kuà, pơhì pơhà mờ bơta ờ niam là kơnòl broă is ồn kwơ màng, sùm sùm, jŏ jòng bơh broă lơh bơt bơtàu, lơh niam wơl Đảng mờ ală anih lơh broă cíñ trị. Kràñ cê jơh nùs, jơh nùs lơh ngan tam dră kơryan, tơrmù sa kuề sa kuà, pơhì pơhà mờ bơta ờ niam là gùng dà broă lơh sùm sùm, ờ tŭ lơi tam gơl bơh Đảng, Dà lơgar he dê. Den tàng, broă ai lơh jat Jơnau lơh nền tàm pơrjum bè sơlơ tơnguh tai bơta đơng lam bơh Đảng dê gơwèt mờ broă lơh sa kuề sa kuà, pơhì pơhà mờ bơta ờ niam tàm tơngai pa tàm dơ̆ Pơrjum dà lơgar 2 khoă 14 tơn, đơs nền bơta sền gròi is ồn bơh Đảng dê, là “jơnau đơs” bơh Đảng dê bè pơn jat tai kràñ cê jơh nùs, kơ̆ nùs lơh pràn broă lơh tam dră wơl mờ bol sò tơm tàm dơlam is” tàm tơngai pa mờ bồ tơngoh kơlôi sơnơng, broă lơh pa.