Do là dơ̆ pơrjum sơnrờp ngan tơnơ̆ mờ tŭ Mpồl Sồr lơh geh crơng gơs, ai tơngŏ nùs nhơm jal mhar, nền nòn, di pal, at tê mờ tàm kơnòl broă dờng Đảng dê tàm tơngai pa. Jơnau đơs pơn dŭt dơ̆ lơh broă, Tổng Ƀí thư ồng Tô Lâm đơs loh nùs nhơm, he gam rơcang ai tơngŏ dùl bơta pa kwơ màng hơ̆ là tơnkah 100 nam dà lơgar tềng đăp mờ broă đơng lam bơh Đảng Kộng sản Việt Nam mờ 40 nam lơh jăt Gùng dà bơ̆t bơtàu dà lơgar tàm rài guh củ nghĩa sàh hội.

Tơn jơh 100 nam là dơ̆ nàng he sền wơl jơh gùt tơngai Đảng đơng lam jơi bơtiàn: bơh tam lơh nàng geh bơta krơi is, tơrgùm bal dà lơgar, tus mờ broă bơ̆t bơtàu mờ sền gàr Dà lơgar sàh hội củ nghĩa; bơh kơrnoăt broă rơndăp lơh tơrgùm bal tus mờ broă Tam gơl pa tơl ală bơta; bơh dùl dà lơgar rơƀah, ờ pràn gơs dùl dà lơgar geh bơngă ngai sơlơ uă tàm ală lơgar. Do là dơ̆ niam nàng lơh loh rơlao broă bơtàu tơnguh, ală cồng nha neh lơh geh, ală broă lơh gam ờ pràn, gơkòl, tài bơta lơi mờ jơnau bơsram broă lơh mờng chài. Kwơ màng rơlao là rơcang tơngu me jơnau đơs bal mờ broă lơh mùl màl ai ală broă lơh kwơ màng tàm tơngai bơtàu tơnguh pa in, wèt tus nam 2045 mờ ngài rơlao tai là gùng dà broă đơng lam bơtàu tơnguh dà lơgar tus nam 2130.