Drim òr (30/12), Tổng Ƀó thư ồng Tô Lâm neh tus mờ đơng lam dơ̆ tìp măt cau bơsram dờng, cau jak chài gùt lơgar. Ală cau ala măt yal ală cồng nha neh lơh geh tàm broă kơlôi sơnơng, ngui, bơto bơtê bơh ờ uă gah broă kwơ màng bè lơh sơnơm, broă lơh sa suơn sre, măi mok pa… ; broă hòi jà, tơrgùm mờ ngui gơnoar bơh mpồl cau bơsram dờng, cau jak chài mờ ai geh jơnau đơs, jơnau dan gơwèt Đảng mờ Dà lơgar.

Đơs tàm dơ̆ tìp măt, Tổng Ƀí thư đơs nền cau bơsram dờng là mpồl ala măt cau ngăc ngar, bơta chài bơh làng bol mờ jơi bơtiàn, là dùl tàm ală bơta tờm bal mờ bơta kwơ màng ngan cèng geh broă lơh pràn mờ pas sơm ai dà lơgar in. Sồr kấp ủy, gơnoar atbồ ală kấp, pal tam gơl pa pràn kơl dang broă bơto, rơwah, ngui cau bơsram dờng, cau jak chài nàng pơn jăt tai bơ̆t bơtàu mờ ngui gơnoar bơh mpồl cau bơsram dờng di pal mờ jơnau kờñ bơtàu tơnguh dà lơgar mhar mờ kơ̆ kơl jăp. Tổng Ƀí thư kung sồr, mpồl cau bơsram dờng, cau jak chài tàm gùt lơgar gờñ lơh ngan tus nam 2030 pal geh 100 broă jòi gŏ, bơceh lơh, broă lơh khoa họk tàm rơndăp tăp sèng bơh jak chài dunia dê; phan bơna jak chài, măi mok pa, jơnau cih văn họk, gùng đơs crih geh uă. Tus nam 2045, mpồl cau bơsram dờng lơgar Việt Nam ơm lài ngan tàm tiah do, gơwèt mpồl lam lài tàm dunia.