Wèt tus tơngkah kir sơnrai 80 nam Kăc màng Nhai Phàm lơh geh cồng nha (19/08) mờ Sơn tờm Dà lơgar Kộng hòa Sàh hội Củ nghĩa Việt Nam 02/09, ngai 31/07 tàm Hà Nội, Tổng Ƀí thư ồng Tô Lâm, Ƀí thư Anih duh broă Đơng lam Đảng Ling klàng Dà lơgar tus bal mờ đơng lam dơ̆ tìp măt ală kwang bàng kăc màng jŏ sơnam, kwang bàng tơngai bơh chờm rài ntàu tam lơh, Mè Việt Nam khin cha jak chài, Kwang ling dờng, Khin cha jak chài Mpồl phàu crong làng bol tàm Mpồl ling klàng làng bol Việt Nam. Boh bơr đềt mềr mờ ală cau ala măt, Tổng Ƀí thư ồng Tô Lâm đơs ngan, tus tŭ do bulah tàm rài ring lơngai, ală cau ala măt neh rlô lơh broă, mơya kung gam pơn jăt tai đòm jăt nùs nhơm “Cau ling Wa Hồ dê”, kung gam cèng nùs nhơm “kràñ cê kơ̆ nùs tam lơh tus lồi dŭt” là anih kơldìng kơnhăp ai rơnàng oh kòn kòn sau in.

Tổng Ƀí thư ồng Tô Lâm dòn kơnờm, mờ nùs nhơm jơh nùs, geh kơnòl, kơ̆ dơn, bồ tơngoh jak mờ gơ jăt tàm bơta geh bơh tơl nă cau dê, ală cau ala măt rơ̆p pơn jăt tai geh ală tă pơgồp gơ wèt mờ broă lơh kăc màng pơnrơ dờng ngan Đảng dê, làng bol dê mờ jơi bơtiàn dê; bal mờ gơ̆p sền gàr, ngui niam bơta pràn mpồl tam klăc dờng jơh gùt jơi bơtiàn ai dà lơgar he ngai sơlơ bơtàu tơngguh pas pràn, gam sùm, gơboh gơbài, tơƀă pơnì bal mờ ală lơgar dờng pràn làm gùt dunia bè jơnau kơ̆p kờñ sùm bơh Wa Hồ kờñ gơboh ngan dê.