Tơngkah kir sơnrai 80 nam ngai tơnggơs Mpồl ling klàng Làng bol Việt Nam, 35 nam Ngai chờ jơh gùt làng bol sền gàr dà lơgar, Tổng Ƀí thư ồng Tô Lâm, Ƀí thư Anih duh broă đơng lam Đảng Ling klàng Dà lơgar neh tus mờ đơng lam dơ̆ tìp măt, pơndờm pơnđiang rơnàng kơnòm să tàm mpồl ling klàng. Boh bơr đềt mềr mờ ală cau ala măt ơruh pơnu mpồl ling klàng jak chài ngan, Tổng Ƀí thư ồng Tô Lâm đơs nền, tàm jơh gùt tŭ tơngai jŏ jòng jơnau kah yau 80 nam do, ală rơnàng ơruh pơnu mpồl ling klàng sùm cèng jơh bơta pràn kơnòm să, bơta jơh nùs jơh tồr, bơta jak chài, bồ tơngoh jak, bal mờ bơta kơ̆ nùs mờ bơta kơ̆p kờñ kơ̆ dơn sùm, nùs nhơm jơh nùs jơh tồr drơng broă Dà lơgar in, drơng broă làng bol in, crăp rơcăng lik lòt, ờ dơrcul jơng tềng đăp ală bơta sơbơng roh ngòt rơngơ̆t, crăp rơcăng lòt lài, ơn pơdơng să lòt khăt tiah lơi, lơh khăt kơnòl broă lơi mờ Dà lơgar bal mờ Làng bol dê kờñ tus.

Đơs sùm, dà lơgar he gam ơm tềng đăp tŭ niam kah yau mŭt tàm rài pa, rài bơtàu tơngguh, pas pràn; Tổng Ƀí thư đơs là, ală kơ̆p kờñ hơ̆, kơ̆p kờñ ngan hơ̆ kơnờm uă ngan tàm mpồl ơruh pơnu, tàm hơ̆ ơruh pơnu Mpồl ling klàng geh gơnoar broă kwơmàng, là mpồl cau tờm, lòt lài. Đảng, Dà lơgar, mờ Làng bol gam kơ̆p gơn, kơ̆p kơnờm uă ngan tàm bơta tam gơl pràn, bơta lơh ngan brồ guh, “sơrlèt is să tờm” bơh ơruh pơnu Mpồl ling klàng dê.