Mho ngai 24/09, tàm Hà Nội, Tổng Ƀí thư ồng Tô Lâm, Ƀí thư Anih duh broă Đơng lam Đảng Ling klàng Dà lơgar neh tus bal mờ đơs tàm Pơrjum dờng Tàm pơrlòng Lơh tus geh jơh gùt ling klàng dơ̆ XI, tơngai lơh broă bơh nam 2020- 2025. Tổng Ƀí thư ồng Tô Lâm chờ hờp bal mờ ală broă lơh geh jak chài ngan bơh ală mpồl, ală cau nă să is mờ mpồl cau dê neh lơh geh tàm srơh tàm pơrlòng lơh tus geh tơngai do; mơkung đơs là, bơta lơh gơrề uă bơh srơh tàm pơrlòng lơh tus geh dê ờ mìng ơm wơl tàm pôs đồng ling klàng, mpồl lơh broă tàm mpồl ling klàng lơm mờ gam lơh gơlik jơnau gơdan gơkờñ tus ală mpồl, ƀộ, gah, ƀòn lơgar, mpồl lơh sa kă bro mờ mpồl bơtiàn in tai, pơgồp bơnah lơh gơs bơta rơndăp tăp sèng tàm pơrlòng gơboh lơgar làm uă bơh dà lơgar dê tàm bơ̆t bơtàu mờ sền gàr Dà lơgar tờm.

Nàng pơn jăt tai gàr niam ală cồng nha neh lơh geh, Tổng Ƀí thư ồng Tô Lâm đơs loh bơta dunia, kơnhoàl ù tiah do tơngai tus pơn jăt tai gơbàn mhar ờ ƀươn soh, tam lơh đah ală lơgar măy mŏk pa gơguh tai; den tàng bè hơ̆ jơnau sồr bơ̆t bơtàu mờ sền gàr Dà lơgar tờm tàm bơta pa gơ sồr mpồl ling klàng he dipal mờ jơnau sồr, jak chài ngăc ngar, pa ngan mờ crăp rơcăng tơl pràn lơh broă ngăc ngar sồ. Tàm bơta hơ̆ tàm pơrlòng lơh tus geh pal tơnggŏ geh: Mpồl ling tam lơh ai broă jàu pơlam tàp ngan ngồn, mờr ndrờm mờ cau, rềp ù tiah ƀòn lơgar, mờr ndrờm mờ phan tam lơh, sền lơh tờm phan tam lơh phàu crong măy mok pa là sơñio khà pal geh, sền duh rơngòt adăt boh lam, lơngăp lơngai là gùng nhàr pơrhê. Dơ̆ do, đơng lam Ƀộ Ling klàng neh pà Bồng bi tàm pơrlòng ai 84 mpồl cau in; pà Sră jờng rơ ai ală mpồl cau mờ cau dồ nă să is tài geh uă broă lơh jak chài ngan tàm srơh tàm pơrlòng Lơh tus geh jơh gùt ling klàng dơ̆ XI.