Drim òr (13/08), Tổng Ƀí thư ồng Tô Lâm bal mờ Pơ-ùr mờ Mpồl Kwang bàng ala măt kấp dờng lơgar Việt Nam neh bơh càr lơgar Seoul tus ƀòn dờng Busan pơn jăt tai ală broă lơh tàm dơ̆ tus còp kấp Dà lơgar tus lơgar Hàn Quốk.

Tơnơ̆ mờ tŭ tus ƀòn dờng Busan, Tổng Ƀí thư ồng Tô Lâm neh wă Kwang atbồ Anih lơh broă ala măt pơnyờ să lài do lơgar Việt Nam ồng Park Soo Kwan tàm lơgar Hàn Quốk. Tàm dơ̆ wă, Tổng Ƀí thư ồng Tô Lâm pà git, mờ jơnau kờñ tơnguh broă cri bơyai mờ lơgar ndai lơgar Việt Nam dê tàm tiah đah jum lơgar Hàn Quốk dê, mờ di pal mờ jơnau kờñ ngai sơlơ uă bơh mpồl bơtiàn cau lơgar Việt Nam dê bal mờ ală lơgar lơh broă bal tàm lơgar do dê, Ƀộ Cri bơyai broă mờ lơgar ndai lơgar Việt Nam neh tơlik jơnau lơh nền nàng crơng gơs Anih lơh broă ala măt lơgar Việt Nam tàm ƀòn dờng Busan. Nàng broă lơh bơh Anih lơh broă ala măt lơgar Việt Nam tàm ƀòn dờng Busan geh lơh ƀuơn mờ mŭt lơh broă geh cồng nha, Tổng Ƀí thư kơ̆p kờñ ồng Park Soo Kwan pơn jăt tai sền gròi, dong kờl mờ ai geh bơta ƀuơn ngan nàng Anih ala măt lơgar Việt Nam tàm ƀòn dờng Busan, lơgar Hàn Quốk tàm tơngai tus in.