Tàm dơ̆ wă, Tổng Ƀí thư chờ gờm ală broă neh lơh geh kwơmàng mờ lơgar Campuchia lơh geh tàm tơngai lài, tơlik nùs nhơm pin dờn lơgar Campuchia rơ̆p pơn jăt tai gàr sùm ring lơngai, kơ̆ kơl jăp mờ bơtàu tơngguh pas sơm. Tổng Ƀí thư đơs sùm gĭt gơ̆p Việt Nam mờ Campuchia geh lơh gơs mờ bơ̆t bơtàu bơh jơnau kah yau tam klăc, đềt mềr mờ crăp rơcăng phi să tài lơngăp lơngai is, ring lơngai mờ bơtàu tơngguh bơh tơl lơgar dê, mơkung tài bơta kwơ bal bơh Asean dê tai. Việt Nam sùm sền dờng màng ală tă pơgồp kwơmàng ngan bơh Campuchia dê gơ wèt mờ broă lơh dong klàs jơi bơtiàn mờ bơtàu tơngguh bơh Việt Nam dê.

Việt Nam đơs nền pơn jăt tai lơh jơh pràn he dê nàng bơ̆t bơtàu pràn kơldang, bơtàu tơngguh gĭt gơ̆p lơgar rềp bal niam bơnĕ, lơh bơyô bal ờs mờng bơh yau mờ lơh broă bal tơl làm mờ lơgar Campuchia, kung bè gĭt gơ̆p lơh broă bal đah pe lơgar Việt Nam – Campuchia mờ Lào.