Tổng Ƀí thư đơs sùm, Việt Nam sùm sền dờng màng gĭt gơ̆p lơh broă bal ờs mờng bơh yau niam bơnĕ mờ lơgar Nga, tàm hơ̆ lơh broă bal bơto kwang bàng là broă tờm kwơmàng, pơgồp bơnah tơngguh uă cồng nha mpồl cau lơh broă drơng broă broă lơh bơ̆t bơtàu mờ sền gàr dà lơgar tàm bơta pa. Tổng Ƀí thư đơs niam ngan ală broă lơh lơh broă bal đah Hìu bơsram kơlôi sơnơng Cíñ trị dà lơgar Hồ Chí Minh mờ Hìu bơsram kơlôi sơnơng Sră pơ àr gơnoar ătbồ Kwang ătbồ lơgar Nga tơngai do; pin dờn dơ̆ lòt còp mờ lơh broă bơh Mpồl dê rơ̆p pơgồp bơnah lơh pràn rlau tai lơh broă bal đah bàr Hìu bơsram kơlôi sơnơng mờ ală anih lơh broă geh gơnoar bơh bàr lơgar dê, mơkung pờ gơlik uă bơtàu tơngguh gơn kơnờm pa tàm bơto, tề lam kwang bàng, kơlôi sơnơng jak chài mờ lơh broă bal uă bơta.

Đơs nền Đảng mờ Dà lơgar Việt Nam sùm ai tơl bơta nàng rề ơnàng lơh broă bal đah ală anih bơto bơtê, kơlôi sơnơng tàm ală broă măy mŏk pa, tam gơl pa bơceh lơh, tam gơl sồ mờ ală broă pa ndai, Tổng Ƀí thư ồng Tô Lâm sồr bàr Hìu bơsram kơlôi sơnơng pơn jăt tai gàr cồng nha lơh geh, pờ ơnàng ală broă lơh lơh bal bơto bơtê bè ătbồ broă dà lơgar, cribơyai jơnau tàm sră pơ àr cíñ trị, lơh tam gơl pa sră pơ àr gơnoar ătbồ, ătbồ broă kwơmàng, tam gơl sồ tàm ală anih lơh kơnòl broă dà lơgar mờ pràn jak đơng lam tàm kâp dờng. Mơkung hòi jà tơngguh tai cribơyai cau pơgru bơto kao đẳng đại họk, cau kơlôi sơnơng, cau bơsram; bơyai lơh ală anih cribơyai jak chài nàng kờñ tam pà mờng chài bơ̆t bơtàu Dà lơgar gơnoar kơrnoăt boh lam, ătbồ broă pa mờ ătbồ bơtàu tơngguh dà lơgar.