Ngai 30/12, tàm Hà Nội, Hìu bơsram kơlôi sơnơng Cíñ trị Dà lơgar Hồ Chí Minh bơyai lơh Pơrjum tơn jơh broă lơh nam 2025 mờ lam lơh kơnòl broă nam 2026. Tổng Ƀí thư ồng Tô Lâm neh tus bal mờ đơs sồr lơh. Đơs wơl jơnau nting tơngkah bơh Củ tịc Hồ Chí Minh dê: “Bơto pơlam kwang bàng là broă tờm bơh Đảng dê”, Tổng Ƀí thư đơs, Hìu bơsram kơlôi sơnơng là anih tơrgùm bồ tơngoh jak, nùs nhơm cíñ trị mờ bơta niam chài cribơyai bơh Đảng he dê; anih tờm kơlôi sơnơng jơnau cribơyai cíñ trị khà dùl bơh dà lơgar dê; là anih is ồn pin dờn ngan tàm broă lơh bơto bơtê, bơto pơlam kwang bàng, ngan là kwang bàng kâp dờng. Tàm tŭ tơngai gùt đảng, gùt làng bol, gùt ling klàng he dê gam wèt tus Pơrjum dờng dơ̆ XIV mờ bơta kơp kơnờm lơh gơs dùl tŭ tơngai bơtàu tơnguh pa, Tổng Ƀí thư sồr, tơngai tus, Hìu bơsram kơlôi sơnơng Cíñ trị dà lơgar Hồ Chí Minh tơrgùm lam lơh 6 gùng dà geh ai tơlik  lài mờ kơnòl broă tờm, pơn jat tai tam gơl kuơmàng broă lơh bơto bơtê, bơto pơlam kwang bàng jat gùng dà ngan ngồn, geh cồng nha, pa ngan, pơgồp bal nền nòn mờ jơnau sồr lam lơh jat ngan ngồn ală jơnau lơh nền kuơmàng bơh Đảng dê.