Jơnau đơs tàm dơ̆ bơyai lơh đơs loh, ngai 06/01/1946 là dùl tềl àng gơ crà ngan, pờ gơs dùl tŭ tơngai bơtàu tơnguh pa bơh jơi bơtiàn Việt Nam dê. Jai pha bơh Dơ̆ tĕ khà dờng dê neh đơs nền kơ̆ kơljap gơnoar lơh tờm bơh làng bol dê, bơh bơta dĭ gơna ntàu guh ai wơl lơngăp lơngai is, tơng gơs Dà lơgar he dê, mờ wil tơl bơnàng jă adat boh lam ala mat ai jơh gùt làng bol he in tàm lơgar mờ ală lơgar, mờ là Dà lơgar làng bol lơh tờm sơn rờp tàm Tiah đah jum mat tơngai lik câu Á. Sùm tàm 80 nam do, mờ 15 tơngai lơh broă, tàm khat dùl tŭ tơngai lơi, Quôk hội ndrờm geh ală tă pơgồp kuơmàng ngan tàm broă lơh kac màng dờng màng ngan bơh Đảng, jơi bơtiàn dê, di ngan là anih lơh broă ala mat dờng ngan rlau jơh bơh làng bol dê, là anih lơh broă geh gơnăp gơnoar dà lơgar dờng ngan rlau jơh mờ là anih tơrgùm bồ tơngoh jak, nùs nhơm, bơta kơp kờñ bơh jơh gùt jơi bơtiàn dê.

Đơs tàm dơ̆ bơyai lơh, Tổng Ƀí thư ồng Tô Lâm dùl dơ̆ tai đơs nền, bơh tềl kah yau nam 1946, Quôk hội Việt Nam ngai sơlơ dờng pràn, pràn kơldang, ai tơnggŏ gơnoar broă là anih tờm bơh rài kis cíñ trị - adat boh lam dà lơgar dê, là mpồl crơng gơs adat boh lam at gơnoar broă tờm ngan tàm broă bơt bơtàu mờ lơh sir Dà lơgar gơnoar adat boh lam sàh hội củ nghiã Việt Nam. Wèt tus tơngkah 100 nam ngai tơng gơs Đảng (1930 – 2030), 100 nam ngai tơng gơs dà lơgar (1945 – 2045) mờ nàng lam lơh ngan ngồn bơta kơp kờñ Việt Nam gơ gơs dà lơgar bơtàu tơnguh, pràn kơldang, bơtàu tơnguh mờ gơboh gơbài, Tổng Ƀí thư đơs loh gơnoar broă bơh Quôk hội dê tàm bơt bơtàu mpồl lơh broă bơtàu tơnguh geh gơtha kuơmàng is ồn ngan, pờ gùng ai tam gơl pa bơceh lơh in, ai bơtàu tơnguh mhar mờ kơnhăp jŏ dà lơgar in.