Hìu bơsram mầm non Krông Bông, sàh Krông Bông, càr Dăk Lăk tơnơ̆ tơmŭt bal geh 1 hìu bơsram tờm, 2 hìu bơsram pơn jăt bal mờ 3 hìu bơsram ngài is mờ 515 nă kơnòm dềt. broă gàr kơnòm bơsram, cau pơgru tàm ală hìu bơsram lài do dong kờl tơrmù bơta tàm bơrlŭ bal, mơya ai geh jơnau kơlôi bè broă atbồ dùl hìu bơsram tàm dùl bă ù dờng ơnàng, kơnòm bơsram ờ tơrgùm bal.

Mò Lê Thị Thúy Nga, Lam bồ hìu bơsram pà git: “Hìu trŭ sa tàm hìu bơsram Măng Non là ai piang sào 2 hìu bơsram ndai in, den tàng là geh broă pơn diang phan sa tus tàm dùl hìu bơsram ndai in. Hìu bơsram Hoạ Mi den geh dùl hìu trŭ sa ai piang sào dùl hìu bơsram ndai mờ 2 hìu bơsram dềt in, den tàng kung tìp uă kal ke tàm broă pơn diang phan sa ai kơnòm bơsram in bơh priă tă ală cau mè bèp dê”.

Tŭ dùl hìu bơsram tơnơ̆ mờ tăp sèng geh uă hìu bơsram pơn jăt bal, jơnau kờñ atbồ broă bơto bơtê ờ gơtùi mìng kờp jăt broă lơh bơh hìu bơsram tờm dê. Tàm Hìu bơsram Kấp dùl Nguyễn Du, sơnah ƀòn Tân Lập, càr Dăk Lăk, jơnau kờñ cau cau drơng broă Đội tàm ală hìu bơsram pơn jăt tai là dùl jơnau kờñ đơs pơniơu. Mò Nguyễn Thị Hương, Lam bồ hìu bơsram pà git, tŭ do pal ai cau pơgru lơh broă pơgồp bal: “Broă dờng ngan bơh ală hìu bơsram dê tŭ do gam gơtìp hơ̆ là ờ tơl dùl mpồl drơng broă mìng dùl kơnòl broă nàng drơng ai broă lơh bơh hìu bơsram dê tàm uă ală hìu bơsram, mờ pal geh jơnau git wă nền nòn. Den tŭ do là ală hìu bơsram gam lơh bè tàm pơgồp bal, hơ̆ là ai cau pơgru boto môn do ha là cau pơgru bơto kấp dùl tus bal nàng lơh. Mùl màl nàng geh dùl nă cau pơgru lơh broă bal den ờ hềt geh. Geh bal cau pơgru đơs crih tus lơh broă tŭ do kung ờ hềt di pal mờ broă lơh hơ̆ sơl”.

Tơnơ̆ tơmŭt bal bàr kấp kấp 1 mờ kấp 2, Hìu bơsram Kấp dùl – Hìu bơsram Kấp bàr Quang Trung, sàh Krông Bông, càr Dăk Lăk geh tơl jơdŭ bơsram ai 19 ơdŭ in, mơya ờ tơluă jơdŭ lơh broă gơnăp gơnoar, jơdŭ lơh jơnau bơsram. Ồng Nguyễn Viết Bá Hoàng, Lam bồ hìu bơsram pà git, bŭ lah hìu bơsram geh jào tai hìu lơh broă tàm ờ uă anih lơh broă lài do nàng rề ơnàng tiah lơh broă, mơya ờ di pal mờ jơnau kờñ. “Jơh ală jơdŭ lơh broă bơh Anih duh broă Làng bol sàh tŭ do bol añ mìng geh ngui lơh ală jơdŭ lơh broă ha là jơdŭ lơh sră nggal mơ. Di lah ai geh priă ha là gùng dà broă lơh bè lơi nàng bol añ sờr ai wơl bă ù nàng bơcri priă lơh tai. Tŭ do di lah ờ geh bă tiah tàm hìu lơh broă Anih duh broă Làng bol sàh lài do den bol añ ờ lơh gơtùi broă. Tŭ do bol añ ờ geh dùl tiah bơto tàp pràn kơl dang să jan lơi is”.

Bơdìh mờ ală broă geh lơh jŏ jòng, broă tam gơl tus mờ broă lơh pa gam gơlik geh ală gơkòl sră nggal tềng đăp măt. Geh ờ uă hìu bơsram pal lơh jăt ală sră nggal gơrềng bal tus mờ màh sồ dia, màh đal măt mpồl lơh broă mờ ƀang kì. Broă lơyài lơh gơs ală sră nggal do di gơlan lơh gơrềng tơn tus mờ broă lơh, priă jền mờ broă lơh bơh hìu bơsram dê.

Mò Bùi Lan Anh, Lam bồ Hìu bơsram Kấp bàr Nguyễn Chí Thanh, sơnah ƀòn Tân Lập yal bè bơta mùl màl: “Hìu bơsram añ dê là Trần Bình Trọng tơnơ̆ bal mờ hìu bơsram Nguyễn Chí Thanh gơs hìu bơsram Nguyễn Chí Thanh. Dùl hìu bơsram pa geh crơng gơs là pal geh màh sồ dia pa mờ màh đal măt mpồl lơh broă pa. Kwang àng kung sồr là bè hơ̆, jơh bàr hìu bơsram lài do kung pal lơh màh sồ dia mờ lơh wơl màh đal măt pa den Kwang àng hơ̆ sồng ai bol añ lơh ƀang kì pa. Di bè hơ̆ tus mờr nggùl nhai do bol añ neh jào ƀang kì bloh, lơh broă là ờ geh adăt boh lam lơi tàm tơngai pa do”.

Gơtùi gŏ, tơnơ̆ mờ tăp sèng wơl ală hìu bơsram, gùng dà geh ai gah Bơto bơtê mờ Bơsram càr Dăk Lăk dê ờ mìng là lơh wơl hìu bơsram, ơdŭ bơsram, mờ pal kơlôi di tus mờ tơl broă lơh hìu bơsram, tơl hìu bơsram pơn jăt bal mờ tơl hìu bơsram ndai in; mờ bơsong ală bơta ờ tơl bè cau lơh broă, jơdŭ lơh broă geh gơnoar, phan lơh broă bal mờ phan bơna nàng drơng tàm broă bơto bơsram. Tơrmù hìu bơsram mìng là cồng nha bơh broă rơndăp tăp sèng. Cồng nha mùl màl bơh broă lơh do rơ̆p ai tơngŏ tàm tơngai pơn jăt tai, tŭ ală hìu bơsram pa lơh broă kơl jăp, bơta niam broă bơto geh gàr mờ kơnòm bơsram tàm ală hìu bơsram pơn jăt bal krơi is ndrờm geh bơta niam nàng geh tìp mờ ală bơta bơto bơsram ndrờm bal.