Mang ngai 21/08, tàm Ƀlàng dờng Ba Đình (Hà Nội), Mpồl dềt ling lòt pơdar, làng bol lòt pơdar bơyai lơh tơrgùm tàp bơrlŭ bal mpồl cau tus bal dơ̆ bơyai lơh tơngkah kir sơnrai 80 nam Kăc màng Nhai Phàm mờ Sơn tờm Dà lơgar 02/09.Rlau 16 rbô 300 nă ling geh griăt, kwang àng mờ 43 mpồl ntàu, 18 mpồl lòt, 6 mpồl rơndeh phào ling klàng mờ 8 mpồl rơndeh mờng ngui tus bal bơsram tàp. Is ồn, geh bơta geh măt bal bơh mpồl ling klàng ală lơgar: Nga, Lào mờ Campuchia dê, tơnggŏ ngan ngồn gùng dà lơh broă mờ lơgar ndai sền gàr dà lơgar bơh Việt Nam dê.

Tơnơ̆ pe jiơ tơrgùm bal tàp, Đại tướng ồng Phan Văn Giang, Ƀộ trưởng Ƀộ Ling klàng đơs niam ngan nùs nhơm duh rơngòt adăt boh lam mờ bồ tơnggoh kơ̆p kờñ ngan bơh ală mpồl dê, ngan ală mpồl ntàu gàr bè ờs broă lơh, nùs nhơm lơh broă di niam ngan. Ƀộ trưởng tơlik nùs nhơm pin dờn, tàm ngai bơyai lơh tờm, jơh gùt ling klàng rơ̆p lơh gơs jak ngan kơnòl broă geh jàu.