Bơh nhai 7 nam do, thôn Tân Hạ, sàh Tà Năng, càr Lâm Đồng dờng ơnàng rơlao, gal làng bol rơlao, tơnơ̆ tŭ tơmŭt bal mờ thôn Chơ Ré. Mờ kờp jơh bă ù ơnàng 476 lồ, rơlao 309 hìu làng bol, uă ngan là làng bol jơi bơtiàn ờ gal cau, broă lơh bơh Phó Bí thư Chi bộ, mờ kung là Kwang Lam bồ thôn mò Cil K’ Hạnh tài bè hơ̆ den tàng kal le rơlao. Lơh bè lơi nàng làng bol bàr tiah ờ gam geh nùs nhơm kơlôi sơnơng “cau yau, cau pa”, mò bal mờ Mpồl lơh broă Mặt trận tus tơl hìu nàng lùp lăp bơh bơr. Tàm ală dơ̆ pơrjum ha là ală dơ̆ lơh broă bal, mò rơndăp broă nàng làng bol 2 thôn lài do geh tus bal, lơh bal dùl broă.

Pal kah ngan là dơ̆ lik lơh broă sơnrờp ngan pơs wàs kloh niam ù tiah, lơh niam wơl gùng ƀòn tơnơ̆ mờ tŭ tơmŭt bal thôn Chơ Ré mờ thôn Tân Hạ. Cau jì ñhơ̆t, cau tam bơkào, cau pơs wàs siồ siă; ală cau lơh broă, boh bơr mờ hùc dà ndang. Sền gùng lòt tàm thôn Tân Hạ tŭ pa pơs wàs niam măt rơlao, mò Cil K’ Hạnh gŏ loh bơta tam gơl. “Tơnơ̆ mờ tŭ tơmŭt bal, añ kơlôi bơta kwơ màng ngan là bañ lời làng bol geh nùs nhơm kơlôi sơnơng “cau yau, cau pa”, mờ pal sền jơh ală ndrờm là làng bol kis tàm thôn Tân Hạ dê lơm. Den tàng, añ lơh ngan đềt mềr, iăt ală jơnau làng bol tàm jơh 2 thôn, broă bal den cri bơyai bal, tus bal mờ tam pà bal kơnòl broă. Añ ờ gơtùi sồr làng bol tam klăc bal mơ, mờ pal lơh geh dơ̆ niam nàng ală cau in geh tìp bal, wă bal mờ lơh broă bal. Tŭ neh lơh bal dùl broă, tài bơta kwơ bal den bơta ờ tam wă geh gơmù is”.

Nùs nhơm pin dờn tus mờ làng bol ờ di bơh ală jơnau chài đơs, mờ geh lơh gơs bơh cồng nha broă lơh. Mò K’ Hạnh dan mờ gơnoar atbồ sàh Tà Năng pờ geh ơdŭ bơto bè broă ròng phan, tam phan ai làng bol in, bơyai lơh nàng làng bol tus bơsram bal mờ broă lơh mùl màl… Mò K’ Hạnh lam làng bol tam gơl ală bă ù phan tam geh cồng nha ờ uă nàng tam ală bơta phan tam gơdờp bal mờ ù tiah rơlao. Gơwèt mờ ală hìu gam kal ke, mò bơto sồr tàm broă tus càn priă sa priă cồng ờ uă. Tus tŭ do, thôn geh 78 hìu càn priă bơh Anih priă jền dong kờl Mpồl bơtiàn, kờp jơh priă jơnkah dồs rơlao 6 tơmàn 200 tơlăk đong; bă ù tam biăp geh mờr 8 lồ, gơguh 3 lồ pơn drờm mờ bồ nam. Thôn kung dờp sền gàr rơlao 780 lồ brê. Mìng is să tờm mò K’ Hạnh dờp ròng siam oh Ka Să Ha Cường (bơsram ơdŭ 3) tài rài kis gơtìp kal ke. Lŏ Cil Yŭ K’ Im, tàm thôn Tân Hạ đơs bè mò Cil K’ Hạnh bè do: “Mò Cil K’ Hạnh là dùl nă cau ùr Lam bồ thôn lơh krơh, lam lài, sùm lam làng bol tàm ƀòn. Hơ̆ là cau mờ bol añ kờñ ngan bơsram bal. Kơnờm bơh mò mờ bol añ git tàm broă boh bơr, tơnguh uă nùs nhơm git wă tàm mpồl bơtiàn. Lài do tŭ mò K’ Hạnh gam lơh broă tàm gah lơh sơnơm thôn ƀòn, tŭ gơtìp ală bơta lơi, mò ndrờm tus tàm broă sơm lài ngan, dong kờl uă ngan cau, kung bè dong kờl bơsong lơh sră nggal ai ală cau ờ git sră in”.

Ồng Bùi Ngọc Nghiễm, Lam bồ Mpồl cau dờng sơnam thôn Tân Hạ đơs, mò Cil K’ Hạnh là Kwang Lam bồ thôn ñhăp ñhar mờ đềt mềr ngan mờ làng bol. Is ồn, tơnơ̆ mờ tơmŭt bal thôn, mò ai tơngŏ geh bơta pràn mờ bơngă pin dờn bơh să tờm dê. “Ờ hềt tơmŭt bal den mò K’ Hạnh tàm thôn Tân Hạ lài do kung là cau ñhăp ñhar ngan sơl. Bơh tŭ tơmŭt bal thôn, lŏ K’ Hạnh kung gam ñhăp ñhar sơl geh nùs nhơm bơ̆t bơtàu uă, làng bol kờñ ngan. Tŭ do là kwang đơng lam thôn Tân Hạ mờ Chơ Ré lài do gơs thôn Tân Hạ pa, kung lơh broă jơh nùs, làng bol pa do pồ tĕ khà kung kờñ ngan sơl mờ geh khà sră pồ tus 97,98%.”

Mờr 17 nam lơh broă tàm ƀòn lơgar, mò Cil K’ Hạnh, Phó Bí thư Chi bộ mờ Kwang Lam bồ thôn Tân Hạ, sàh Tà Năng, càr Lâm Đồng git gŏ nền nòn nùs nhơm tam klăc bal bơh làng bol dê là bơta pràn lơh geh ală cồng nha. Bơh ală broă lơh dềt mơya mùl màl tàm rài kis, mò gam rơhời pơgồp bal tàm broă tơn jơh bơta ờ ndrờm bal đah bàr thôn lài do, nàng thôn Tân Hạ tơnơ̆ mờ tơmŭt bal gơs mpồl bơtiàn tam klăc bal, bơ̆t bơtàu rài kis pa.