Drim ngai 21/1, ồng Đỗ Tiến Sỹ, Kwang bàng Mpồl Duh broă Đảng ƀộ Cíñ phủ, Ƀí thư Đảng ủy, Kwang Lam bồ dờng Anih jơnau đơs Việt Nam neh tus còp, pơndờm pơnđiang cau lơh ƀăo, cau sền sơwì jơnau cih, cau drơng măi mok gam lơh broă tàm tiah bơh VOV tàm Anih tờm sră ƀăo Pơrjum dờng dơ̆ 14 dê. Pơndờm pơnđiang cau lơh ƀăo, cau sền sơwì jơnau cih, cau drơng măi mok pa jat sền cau ala mat cribơyai tơngume Sră nggal Pơrjum dờng tàm dar pơrjum tàm jơrnum pơrjum drim ngai 21/01, Kwang Lam bồ dờng Anih jơnau đơs Việt Nam ồng Đỗ Tiến Sỹ sồr ală mpồl bơh tơl mpồl lơh broă pơn jat tai jat nền ală broă lơh tàm Pơrjum dờng dơ̆ 14 Đảng dê.

Tàm hơ̆, Mpồl Yal tơngĭt jơnau gơlik geh pah ngai VOV1 sền gĭt mhar ală jơnau tus bal cribơyai tàm pờ tơlik jơnau, mblàng yal ală tơngume kwơ màng bơh sră nggal dê tus mờ kwang bàng, đảng viên mờ làng bol. Kwang Lam bồ dờng VOV sồr ală cau lơh ƀăo pal jat nền, geh tai jơnau yal gùt dar Pơrjum dờng nàng pơgồp bơnah đơs nền bơta pin dờn tàm ală tơngume bơh Pơrjum dờng dê, ngan là jơnau đơs bơh Tổng Ƀí thư ồng Tô Lâm mờ ală jơnau tus bal cribơyai bơh ală cau ala mat dê.