Jăt Mpồl Bơyai lơh yal, ală broă pơnrơ geh sră ƀăo yal tàm tơngai do tơrgùm tàm broă lơh jăt gơnoar atbồ bàr kấp, gơkòl tàm ờ uă broă lơh gùng lòt, broă atbồ phan bơ̆t bơtàu, kòp jê ndul gơjroh sur câu Phi mờ broă khih mpồl cau tài sa ƀañ mi tàm sàh Mdrăk.

Bè ală tơngu me do, kwang đơng lam bồ ală Sờh, gah lơh broă gơrềng bal neh geh jơnau yal wơl mùl màl mờ ai geh gùng dà broă lơh nàng tơrmù di pal. Gơrềng tus jơnau “Kal ke gơlik geh tơnơ̆ 15 ngai lơh broă gơnoar atbồ ƀòn lơgar bàr kấp tàm càr Dăk Lăk” geh cih tàm VOV, kwang đơng lam bồ ală tiah gơrềng bal neh dờp VOV neh đơs di broă. Ồng Nguyễn Tự Do, Phó Củ tịc Anih duh broă Làng bol sàh Quảng Phú pà git, ală kal ke mờ sră ƀăo cih, neh geh tơrmù, broă lơh bơh sàh tŭ do neh niam. Tàm dơ̆ pơrjum ƀăo, kwang đơng lam bồ càr Dăk Lăk kung yal bè ală gùng dà broă lơh nàng tơnguh bơta pràn lơh sa dà lềng, brê bơnơm mờ broă rơndăp lơh ală broă lơh tờm.