VOV4.K’ho- Sơnđờm bơh ngai do 15/3 tus jơh ngai 31/12/2021, Kảnh sát gùng lòt tàm gùt lơgar ai cau lòt sền, gròi sền, bơsong lơh tìs jăt tơngume “Cau măy rơndeh lòt tàm gùng mờ tàm să jan geh ma túy, lơh tìs khà angkol” jăt broă rơndăp lơh bơh Bộ Kuang àng dê.

Jăt mờ hơ̆, Mpồl kảnh sát gùng lòt tơrgùm lòt sền, gròi sền tàm ală gơl gùng lòt tờm tàm tiah drà, ală gơl gùng rơndeh ntoăt răt, gùng rơndeh dờng kuơmàng, ală gùng lòt pơndiang năc lòt nhơl, phan bơna kă bro, ală gơl gùng sùm gơtìp rềs àr gùng lòt; ù tiah rềp tiah rơndeh lòt, tiah ƀlàng rơndeh ơm, anih ơhò ơm, tiah ƀlàng, tiah hìu bar, tiah tam ya, hìu ñô sa, hìu tăc phan sa, tiah kal ke bè lơngăp lơngai, rơndăp tăp sèng ờdo ờdă, ma túy. Jăt mờ hơ̆, tơrgùm tàm ală cau măy rơndeh mô tô, rơndeh ô tô dềt, ô tô pơndiang năc, ô tô pơndiang phan, rơndeh pơndiang container, rơndeh ô tô hoài rơ moóc halà rơndeh ô tô bồ hoài rơ moóc.

Cau mblàng Lơ Mu K’Yến