VOV4.K’ho – UBND càr Kon Tum pa geh kơrnuat ai wơl mờr 20 lồ ù bơh Tiah tờm sơntìl lơh sa suơn sre – chi brê nàng jàu UBND kơnhòal Đăk Hà in atbồ mờ ngui. Bơta pal đơs là bă ù do pơgao mờ do 9 nam, Sở Nông nghiệp mờ Phát triển Nông thôn càr Kon Tum neh bơcri 17 tơmàn đông lơh dùl Trạm sơntìl lơh sa suơn sre nàng lơh gơlik ka sơntìl mơya neh gơtìp sang te\ gời.

Gơ wèt mờ làng bol tàm thôn 7, xã Đăk Lak, kơnhòal Đăk Hà, càr Kon Tum, broă lơh sơntìl lơh sa suơn sre geh tă pria\ lơh tàm xã là dùl bơta hoàc huơr pria\ jền bơh dà lơgar dê. Hoàc huơr là tài broă lơh dờng mơya bơh tu\ lơh gơs tus tu\ do, sùm 9 nam do, ndrờm bè jơh ală phan bơna bơh Trạm dê gơtìp sang gời lơm. Bi Nguyễn Duy Vinh ơm tàm do pà git: “A` là dùl nă cau ơm tàm do, a` go\ bơh tu\ lơh tơnau, hơ\ sồng cho\ ù tờ tơnau, lơh gơs ờ sền go\ ròng dùl nơm ka lơi tơn. Hơ\ sồng sang gời tơn, nhơt hòn bềng tơn”.

Broă lơh Trạm sơntìl lơh sa suơn sre geh Sở Nông nghiệp mờ Phát triển Nông thôn càr Kon Tum tă pria\ lơh tàm thôn 7, xã Đăk La, kơnhòal Đăk Hà geh pria\ bơcri 17 tơmàn đông. Dialh rơndap broă ờ gơtìp sang gời, den do geh là anih lơh gơlik ka sơntìl dờng ngan rlau jơh tiah Tây Nguyên. Mơya, bulah bơcri pria\ nàng lơh gơlik sơntìl, mơya 45 tơnau ròng ka tàm do gùt nam ờ geh dà.

Dùl tơnau ròng ka gơtìp sang gời tơ nơ\ tu\ lơh

Ồng Phạm Tài Nam, lài do là cau lơh broă bơh Tiah tờm pơlam broă lơh sa càr, tu\ do neh jơh sơnam rê rlô lơh broă dờp lơh sền gàr broă lơh do pơlai ngan: “A` go\ broă lơh do hoàc huơr ngan. Đah Tiah tờm pơlam broă lơh sa kung bè Tiah tờm sơntìl kung kờ` lơh ngan sơl mơya cau lơi kung lơi kung ờ gơtùi lơh lơm. Tiah tờm kung dan mờ kơnhòal, mờ càr dan pria\ nàng lam dà bơh Đăk Hà rê, nàng tơmut tàm bơ tơt dơng dà Cà Sâm, dut ndơl den ờ gơtùi. Tu\ do kung gam sang gời bè do, ai dilah ờ geh dà den mbè gơtùi ròng ka”.

Geh UBND càr Kon Tum jàu atbồ, ngui mờr 20 lồ ù mờ anih lơh gơlik ka sơntìl bơcri git nđờ tơmàn đông sang gời 9 nam do, UBND kơnhòal Đăk Hà gam ờ suk rlau mờ chờ hờp. Ờ suk ngan rlau jơh là pria\ jền kơnhòal dê ờ geh nàng tă drơng broă atbồ, ngui geh cồng nha broă lơh do. Mơya nisơna mìng tơnơ\ 2 ngai UBND càr Kon Tum ki\ Kơrnuat ai wơl ù hơ\ sồng jàu kơnhòal Đăk Hà in atbồ mờ ngui den neh geh mơya jơnau yal bè dùl mpồl lơh sa kă bro jòi git kờ` bơcri pria\ tàm bă ù do.

Ồng Hà Tiến, Chủ tịch UBND kơnhòal Đăk Hà pà git: “Gùng dà bơh kơnhòal dê là hòi jà dùl mpồl lơh sa kă bro bơcri pria\ tàm do. Bơcri pria\ kung lơh jat broă lơh sa suơn sre ngui công nghệ cao tàm tiah do. Jơnau bơceh mpồl lơh sa kă bro neh yal là geh tă 100% pria\ bơcri, bơnah pria\ bơcri pơgap 200 tơmàn đông. Tơngai dơ\ 1 khi geh tă pơgap 100 tơmàn đông nàng bơcri lơh phan bơna bè lơh gùng lòt, tam chi, lơh niam ală tơnau ka gam geh tu\ do nàng lơh gơlik sơntìl phan tàm dà mờ bă sre lơh kòi tu\ do pơn jat tai lơh gơlik sơntìl jat broă lơh sa suơn sre ngui công nghệ cao”.

Dilah tơl broă geh lơh di mờ jơnau kờp du\ den mờr 20 lồ ù, tàm hơ\ geh broă lơh lơh gơlik ka sơntìl tàm xã Đăk La, kơnhòal Đăk Hà geh Sở Nông nghiệp mờ Phát triển Nông thôn càr Kon Tum bơcri 17 tơmàn đông hơ\ sồng sang gời 9 nam do tàm tơngai ờ jo\ geh gơ wèt bơta atbồ, ngui mờ kă bro bơh dùl mpồl lơh sa kă bro dùl nă să is dê.

Cau cih Khoa Điềm – Cau mblàng K’Duẩn