VOV4.K’ho- Drim ngai 06/12, Hìu sơnơm dờng càr Kon Tum ngan ngồn yal mờ sră ƀău bè 8 nă cau bơtờp kòp Covid-19 geh git gŏ tàm hìu sơnơm bơh ngai 02 tus ngai 04/12. Jat hơ̆, tàm 8 nă F0 geh 2 nă cau là cau lơh sơnơm, geh 1 nă bác sĩ mờ 1 nă điều dưỡng. 6 nă cau F0 gam wơl geh: 3 nă cau kòp geh hìu tàm ƀòn dờng Kon Tum, kơnhoàl Sa Thầy mờ Kon Rẫy; 1 nă cau ùr pa deh mờ cau tờm hìu bơnhă cau ùr pa deh dê hìu tàm kơnhoàl Đăk Hà mờ 1 nă cau tờm bơh cau kòp hìu tàm kơnhoàl Sa Thầy dê. Jơh ală cau F0 geh git gŏ tàm Hìu sơnơm dờng càr Kon Tum neh geh jun tus tam cah is sơm kòp tàm Hìu sơnơm ing sồ 1 càr Kon Tum.

Tơnơ̆ tŭ git gŏ 8 nă F0, hìu sơnơm dờng càr Kon Tum neh jòi cau ơm rềp, tam cah is ală cau F1, F2; sơlơ gàr kloh niam tiah kis gùt dar, ƀồm sơnơm lơh kloh khuẩn tàm ală khoa geh cau bơtờp kòp Covid-19; lam lơh nền nòn broă lơh gròi sền cau ròng cau kòp mut mờ lik tàm hìu sơnơm; sùm gròi sền bơta bơtờp kòp gơ wèt tus mờ cau kòp, cau tờm ròng cau kòp mờ jơh ală cau lơh sơnơm.

Cau mblàng K’Duẩn