VOV4.K’ho - Tỉnh ủy Kon Tum lơh jăt jơnau kờñ tàm 5 nam tus lơh ngan geh 4 kơnhoàl mờ ƀòn dờng Kon Tum geh khà ƀòn lơgar pa ha là lơh gơs kơnòl bơ̆t bơtàu ƀòn lơgar pa. Nàng lơh geh jơnau kờñ do, càr Kon Tum ai pal lơh, lơh jăt niam 8 mpồl kơnòl, broă lơh, tàm hơ̆ geh sền kuơ broă lam sồr nàng làng bol tus bal bơ̆t bơtàu ƀòn lơgar pa.

Tus tŭ do càr Kon Tum geh 28 xã geh dờp xã ƀòn lơgar pa. Bơdìh mờ 10 xã neh lơh geh bơh 15 tus 18 khà broă; 45 xã geh bơh 10 tus 14 khà broă mờ 2 xã geh bơh 8 tus 9 khà broă. Tỉnh ủy Kon Tum ai tơngu me tàm 5 nam tus lơh ngan geh 4 kơnhoàl mờ ƀòn dờng Kon Tum geh khà ƀòn lơgar pa ha là lơh gơs kơnòl bơ̆t bơtàu ƀòn lơgar pa. Geh bơh 60 xã geh khà xã ƀòn lơgar pa rơlao hờ đang mờ 100% khà xã geh khà ală khà broă kuơ màng tàm broă bơ̆t bơtàu ƀòn lơgar pa, bè: rơndăp ù tiah, gùng lòt, bơtơ̆t rơbòng dà, ồs đèng, phan bơna chài rơgơi, hìu ơm ƀòn lơgar, khà cau lơh broă geh broă lơh sùm...

                                     Dơ̆ lĭk lơh broă bơ̆t bơtàu ƀòn lơgar pa tàm ƀòn dờng Kon Tum

Pa do, tàm pơrjum dơ̆ 3 Ban Chấp hành Đảng bộ càr khoă 16, Tỉnh ủy Kon Tum tơrgùm cri bơyai kơnòl bơ̆t bơtàu ƀòn lơgar pa. Đơs tàm pơrjum, ồng Dương Văn Trang, Bí thư Tỉnh ủy Kon Tum pà gĭt: “Ban Thường vụ Tỉnh ủy neh đơng lam sền wơl, sền nền cồng nha neh lơh geh, broă lơh ờ hềt geh, broă kal ke tàm broă bơ̆t bơtàu ƀòn lơgar pa tàm càr. Ai loh bơta tờm bal mờ bơta ờ tờm tàm broă gam gơbàn. Ai bơh tàm bơta mùl màl càr dê, ală jơnau đơng lam bơh Dà lơgar bè bơ̆t bơtàu ƀòn lơgar pa nàng ai geh khà broă, kơnòl broă lơh mìng nàng bơ̆t bơtàu ƀòn lơgar pa tàm càr tơngai bơh nam 2021 tus 2025”.

Nàng lơh geh khà broă tus nam 2025 geh 4 kơnhoàl mờ ƀòn dờng Kon Tum geh khà ƀòn lơgar pa ha là lơh gơs kơnòl bơ̆t bơtàu ƀòn lơgar pa, Tỉnh ủy Kon Tum ai pal lơh, lơh jăt niam 8 mpồl kơnòl, broă lơh, tàm hơ̆ geh: tơnguh broă lam sồr bè bơ̆t bơtàu ƀòn lơgar pa; tơnguh uă bơta niam rơndăp broă, atbồ mờ lơh jăt rơndăp broă, tàm hơ̆ uă ngan là bè broă tơnguh bơtàu lơh sa suơn sre, ƀòn lơgar; bơcri priă lơh phan bơna lơh sa mpồl bơtiàn ƀòn lơgar pơgồp bal mờ tơnguh bơtàu ƀòn drà; bơ̆t bơtàu wơl broă lơh sa suơn sre tơnguh uă priă geh tàm rài kis làng bol; tơnguh bơtàu broă bơto bơtê, lơh sơnơm, bơta chài rơgơi, sền gàr tiah kis sinh thái; tơnguh uă bơta niam broă Đảng mờ mpồl chính trị tàm ală tiah; lơh geh uă bơta hòi jà bơta pràn bơcri priă bơ̆t bơtàu ƀòn lơgar pa; tơnguh broă đơng lam bơh ală cấp ủy Đảng, atbồ đơng lam bơh UBND ală cấp mờ tơnguh bơta pràn ală mpồl chính trị mpồl bơtiàn tàm ƀòn lơgar tàm broă bơ̆t bơtàu ƀòn lơgar pa.

                            Kuang bàng đơng lam ƀòn dờng Kon Tum tam tòm chi jăt gah gùng lòt

Tơnơ̆ mờ satềp Tân Sửu nam 2021, jơh 10 kơnhoàl, ƀòn dờng càr Kon Tum neh bơyai lơh lĭk lơh broă bồ nam bè broă lam sồr gùt làng bol tam klăc, bơ̆t bơtàu ƀòn lơgar pa mờ ƀòn drà ngăc ngar jăk chài. Tàm ƀòn dờng Kon Tum, gơnoar atbồ bal mờ làng bol 21 xã, sơnah ƀòn neh lơh jăt broă tam tờm chi bồ nam, lơh ngan tàm nam do tam geh 2 rơbô tòm chi; dă mờ bê tông ờ uă gơl gùng lòt tàm ƀòn; lĭk pơs wàs kloh niam ƀòn lơgar.

Ồng Nguyễn Thanh Mân, Chủ tịch UBND ƀòn dờng Kon Tum pà gĭt, nam do ƀòn dờng lơh ngan geh tai 2 xã Chư Hreng mờ Kroong lơh gơs broă bơ̆t bơtàu ƀòn lơgar pa. Tus nam 2023 ƀòn dờng geh khà ƀòn lơgar pa mờ geh khà ƀòn drà bơta II lài mờ nam 2025. Gơnoar atbồ neh jào kơnòl mùl màl tus tơl xã, sơnah ƀòn, anih lơh broă pal lĭk lơh broă geh cồng nha mùl màl: “Gơwèt mờ ală xã lĭk lơh gùng lòt tàm ƀòn, lơh niam ală broă lơh tàm ƀòn lơgar wèt tus broă bơ̆t bơtàu ală khà broă nàng lơh geh khà ƀòn lơgar pa. Gơwèt mờ ală sơnah ƀòn lơh wơl bơta niam ƀòn drà, bơyai lơh kĭ hơ bal gơwèt mờ ală hìu làng bol atbồ broă lơh kỹ thuật ƀòn drà, sền gàr tòm chi. Bal mờ hơ̆ UBND ƀòn dờng geh lơh niam wơl ƀòn drà, tàm hơ̆ uă ngan là bơcri priă lơh niam wơl jăt gah gùng lòt, anih tơlĭk dà ƀơ̆, tòm chi, ồs đèng bơka tàm ală gơl gùng tàm dơlam ƀòn dờng. Wèt tus broă bơ̆t bơtàu ƀòn dờng Kon Tum geh khà ƀòn drà bơta II, ƀòn dờng geh lơh jăt ờ uă broă lơh tờm nàng pờ ơnàng bơta niam ƀòn drà".

Bal mờ ală broă lơh bal, gơnoar atbồ tơl xã, kơnhoàl tàm càr Kon Tum ai bơh tàm bơta mùl màl bơh tơl tiah dê nàng geh broă lơh krơi is, nàng gàr niam mờ tơnguh uă gơwèt mờ tơl khà broă ƀòn lơgar pa mùl màl. Ồng Nguyễn Văn Thủy, Phó Chủ tịch UBND kơnhoàl Kon Rẫy pà gĭt: “Tàm uă ngan broă lơh den bơta tờm hơ̆ là lam sồr làng bol tus bal mờ ală broă ngui bơta gơguh jăk tàm broă lơh sa suơn sre nàng lơh geh bơta kuơ gơguh uă, priă geh niam rơlao tàm dùl bă ù nàng bơsong priă geh bal mờ klàs mờ rơƀah kơl jăp. Mùl màl hơ̆ là ai ală sơntìl pa geh bơta niam, cồng nha uă tàm broă ngui broă tam phan lơh sa gơwèt mờ bơh tơl bơta phan tam nàng lơh geh uă priă rơlao, bơsong geh bơta kal ke bè priă geh làng bol in".

Nàng pơn jăt tai gàr niam, tơnguh uă ală khà broă, gơnoar atbồ 28 xã geh khà ƀòn lơgar pa càr Kon Tum dê pơn jăt tai chồl pràn broă lam sồr bè bơ̆t bơtàu ƀòn lơgar pa; geh sùm cồng nha broă pơrlòng “Kon Tum tus bal bơ̆t bơtàu ƀòn lơgar pa” hoì jà, ngui uă ngan ală bơta pràn nàng tơnguh, gàr niam mờ tơnguh uă ală khà broă geh ai.

Cau mblàng Ndong Brawl