VOV4.K’ho - Broa\ lơh broa\ sa bơh càr Kon Tum gam pal kong ngan  mờ gơbàn aniai kơnjơ\ ngan tài bơh trồ prang dờng. Kờp tus jơh nhai 3, neh geh rlau 3 rbô lồ chi tam bơh Kon Tum gơbàn ờ tơl dà, sang sơbì gời mờ lơh tơmù cồng nha tơnhàu. Mùl màl ài go\, geh dùl bơta gơlam tus  bơta prang soat ờ tơl dà slơ ngai slơ kơnjơ\ tàm Kon Tum ngan la  broa\ rơndap  tiah geh tơl dà tuh  bơh ala\ bơtơt rbòng dà gơbàn aniai.

            Bơtơt rbòng dà C19 rềp bal 2 kơnhoàl Đắc Tô mờ Đắc Hà, càr Kon Tum geh lơh nàng geh dà tuh  tus 74 lồ chi tam đah đơm bơtơt, tàm hơ\ ba\ ù tam kơphe la 44 lồ, gam wơl la kòi sre. Mơya tu\ do,  bơtơt rbòng dà do gam pal tuh dà geh tus 187 lồ chi tam ua\ ngan la kơphe mờ tiêu, ua\ rlau ir pơndrờm mờ rơndap lơh tus rlau 250%. Ồng Lê Khắc Tiến atbồ broa\ lơh  bồm dà chi tam in tàm kơnhoàl Đắc Tô ai git,  gơbàn geh bơta do  geh lơh broa\ rơndap tiah geh dà bơh bơtơt rbòng dà C19 gơbàn aniai bơh  làng bol sùm  rề ơnàng ba\ ù lơh broa\ sa, tam phan. Do kung la bơta bơh tài geh lơh bơtơt rbòng dà do nam lơi kung gờ` ngan  soat jơh dà:“Tu\ do, khà dà tàm bơtơt dà neh tàm khà dà chơt. Dilah trồ tơngai duh ngan  jo\ jòng rlau tai tàm 2 poh tài den bơta kờ` dà bơh kơphe, tiêu gơ guh ua\ rhời geh tuh tus 5 dơ\ den dà tàm tơnau geh  gơbàn soat jơh, ờ tơl nàng geh tuh dà tus rlau 180 lồ làng bol tam tam, lơh sa. Dilah trồ tơngai duh jo\ jòng  tus jơh nhai 4 den di gơlan ba\ ù tam kơphe tam pa, tiêu geh gơbàn chơ\. Kơphe yau kung gơbàn aniai tus cồng nha lơh sa kung bè suơn chi tam”.

Bơtơt rbòng dà C19.

            Bơta ờ suk ngan la tu\ rơndap tiah tuh dà  bơh ua\ ngan ala\ tơnau bơtơt tàm Kon Tum neh  gơbàn ờ di rơndap, khà dà tàm nhai prang sùm gơ ơm tam bơta ờ hoan geh dà  den  broa\  rề is ơnàng ba\ chi tam, geh tam is chi tam bơh làng bol gam ờ hềt geh bơta gơ ơm wơl. Tàm Đắc Tô, mo tơn bơh tàm gùl nhai prang,  bơta kơl  cao su nàng tam kơphe, tiêu, 2 bơta chi tam gơ kờ` ua\  ngan dà, gam lơh geh ua\ ngan. Bi Nguyễn Anh Quyết hìu kis tàm [òn 8, ntum Diên Bình ai git:“Cao su tàm nđờ nam do den gơmù pria\, geh lơh  làng bol pal kơl sang nàng tam kơphe hala tiêu, ai tu\ do lời  cao su gơ gơ mù khà pria\ lơyah ir. Làng bol he tu\ do sùm lơh jat srơh broa\ lơh lơm,  gam geh dà kàr  lơi den geh kơnờm kàr hơ\ lơm gơ. Tuh dà dơ\ lơi git dơ\ hơ\”.

            Broa\ lơh lơh sa jat srơh broa\ lơh, lơh tus kàr lơi git kàr hơ\ bơh ua\ ngan làng bol tàm Kon Tum, ờ mìng geh lơh aniai rơndap broa\ geh dà tuh mờ gam lơh ala\ bơtơt rbòng dà pal tam pà dà mờ gam geh lơh bal bơta “chơt bal” tàm hơ\ geh sa\ tờm khi. Mò Trương Thị Tự kis tàm [òn 5, ntum Diên Bình, kơnhoàl Đắc Tô nam lài neh tam gơl 2 lồ cao su gơs tam kơphe bơh sa tềp he tus du\ do neh  20 dơ\ bồm dà  mờ tu\ do gam ờ gam dà tai nàng bồm, geh ai git:“Tu\ lài tam cao su ờ go\ di tam kơphe. Go\ dà tàm  bơtơt ua\ den he tam. Git  ờ geh dà bè do den ờ tam ờ. Tu\ do tam hơ\ sồng git”.

            Tus tu\ do,  ua\ ngan ala\ kơnhoàl,  [òn dờng bơh càr Kon Tum ờ hềt geh rơndap nền nòn tus tơl bơta chi tam tàm ù tiah den tàng broa\ làng bol geh tam is hala tam gơl chi tam  gah lơh broa\ geh gơnoar ờ gơtùi tus bal. Broa\ lơh atbồ mìng dùl lơm tus tu\ do mìng la mblàng pơlam mờ lam sồr. tềng đap broa\ làng bol geh lơh  ờ niam rơndap  lơh sa geh dà tuh gơlam trồ prang den slơ gơbàn prang rlau, hờ đah mpồl atbồ bơtơt rbòng dà, ồng Trương Hồng Sơn kuang jat jơng atbồ cơldu\ bơta chài atbồ broa\ lơh-Mpồl atbồ mut ngui broa\ lơh bơtơt rbòng dà càr Kon Tum, ai git:“Bol a` kung geh jơnau sồr gơnoar atbồ [òn lơgar lơh ngan rơndap lơh wơl mờ lơh mbè lơi nàng git geh wơl ba\ ù  tuh dà bơh tơl broa\ lơh, mơ kung geh ala\ broa\ lơh tam  gơl  chi tam mbè lơi nàng di pal mờ bơta pràn bơh bơtơt rbòng dà, ờ di lời tàm bơta  jơh tam den ờ  tơl dà tuh. Bè hơ\,  tu\ do neh go\ ua\ ngan gơbàn kal ke bè dà tuh”.

Ua\ ngan bơtơt rbòng dà tàm Kon Tum pal tuh ua\ ir dà.

            Broa\ lơh broa\ sa bơh Kon Tum gam pal kong mờ bơta trồ prang dờng ngan bơh rài kah yau pơndrờm mờ chi tam gơbàn aniai gơguh pah ngai. Bơta mpờl go\ ngan la hoàc hươr ua\ ngan gơlik geh tàm ba\ ù bơh làng bol geh  rề ơnàng tam is mờ tam gơl chi tam gơ ơm bơdĩh rơndap broa\ lơh tiah  tuh dà bơh ala\ bơtơt rbòng dà. Den tàng ngan,  bè jo\ jòng, nàng  rcang sơndra\ trồ prang geh cồng nha, do la bơta kờ` ngan  geh gơnoar atbồ [òn lơgar mờ gah lơh broa\ geh gơnoar [òn lơgar pal kah.

                   Cau cih mờ yal tơnggit K’ Brọp