VOV4.K’ho - Nghị quyết sồ 05 bơh Ban chấp hành Đảng bộ kơnhoàl Lăk, càr Dăk Lăk bè broă “đơng lam lơh jăt broă tam gơl phan tam, phan ròng tơngai bơh nam 2021-2025”, tơnơ̆ mờ mờr dùl nam lơh jăt neh ai geh bơta gơrềng niam uă tiah, pờ geh gùng dà tơmù rơƀah kơl jăp ai làng bol kòn cau kis tàm tiah gơtìp kal ke do in.

Bơta geh pơnrơ ngan bơh Nghị quyết sồ 05 bơh Đảng bộ kơnhoàl Lăk, càr Dăk Lăk là hòi jà jơh gùt mpồl lơh broă chính trị bơh kơnhoàl tus mờ ƀòn tus bal. Kuang bàng, cau geh đảng lam lài tus bal lài, mờ nùs nhơm geh kơnòl “rềp mờ làng bol, tài làng bol, drơng gàr làng bol in”.

                      Bí Thư Huyện ủy ồng Võ Ngọc Tuyên pà tờm sơntìl làng bol kis tàm xã Buôn Triết in

Ờ ngui khà kes priă, gùt kơnhoàl hòi jà broă tă pơgồp bơh kuang bàng, cau geh đảng; ală anih lơh broă, mpồl lơh broă, mpồl lơh sa kă bro lơh oh mi mờ ƀòn làng bol kòn cau pơgồp priă blơi git nđờ rơhiang rơbô tờm phan tam sơntìl pà ală hìu rơƀah in; bơto sồr tàm broă tam, sền gàr. Tàm bồ nam lơh jăt, kơnhoàl Lăk neh geh lơh pràn kơl dang ngan tàm broă tam gơl phan tam, lơh gơtìm tơlir tàm bă ù ờ gơtùi lơh sa.

Tàm ƀòn Dơ Tu, xã Buôn Triết, kơnhoàl Lăk, càr Dăk Lăk, ală suơn ờ geh tam phan, ù tiah klàr, ală dòr bơnơm lời gời tŭ do neh geh bơta tơlir tài ală hìu neh geh pà tờm phan tam, bơto sồr broă tam, sền gàr di pal. Bi Y Jony Byă, kis tàm ƀòn Dơ Tu, xã Buôn Triết, kơnhoàl Lăk chờ hờp tài neh di tŭ tam git nđờ rơbô tờm pơnăt thái lài mờ kàl mìu tŭ do neh hòn gơs niam tàm bă ù 4 sào: “Hìu nhă añ ưn ngài ngan kơnhoàl, xã neh ai pà sơntìl tờm chi sa plai nàng tam gơl phan tam tàm bă ù bơh hìu nhă añ dê jăt broă lơh tam bơrlŭ bal. Hìu nhă geh lơh ngan sền gàr nàng tơnguh bơtàu tai broă lơh sa bè tờm chi sa plai, rơhời bơh tŭ hơ̆ klàs mờ rơƀah”.

                                                          Ală tờm sơntìl 0 đong geh pà làng bol in

Tàm xã Yang Tao, kơnhoàl Lăk, suơn tờm pơnăt thái tam bơrlŭ bal bơh ồng Y Gham Triết, kis tàm ƀòn Bhốk kung neh hòn gơs niam tơnơ̆ mờ dùl tơngai tam. Ồng Gham pà git, ờ mìng geh pà git nđờ jơ̆t tờm chi sa plai, kuang bàng kơnhoàl, xã gam tus tàm suơn nàng bơto sồr tàm broă tam mờ sền gàr den tàng tờm chi sa plai geh hòn gơs niam. Wă bơta kuơ bơh broă tam gơl phan tam di pal, ồng Y Gham Triết kờp dŭ tàm kàl mìu do geh tam jơh tờm chi tàm bă ù suơn gam lời gời uă nam: “Hìu nhă añ kung geh xã pà tờm chi sa plai nàng tam sơl. Añ ưn ngài Dà lơgar neh dong kờl. Añ kơ̆p kờñ dà lơgar pà tai tờm chi nàng tam tai tàm suơn do, lơh ngan tơnguh bơtàu broă lơh sa”.

                                                               Làng bol tam tờm chi sa plai

Ồng Nguyễn Văn Huyên, Bí thư Đảng uỷ xã Yang Tao, kơnhoàl Lăk pà git, tŭ do gùt xã neh pà rơlao 7 rơbô tờm chi sa plai, tàm hơ̆ geh tờm pơnăt thái, tờm lơ-u xiêm, tờm mẵng cầu ai 1 rơbô 473 hìu rơƀah in. Bal mờ hơ̆, xã neh lơh 22 broă lơh tam pơnăt thái tàm 11 ƀòn xã dê nàng làng bol tus bơsram; pơn jăt tai lam sồr ală mpồl lơh oh mi, cau geh nùs nhơm niam blơi tai tờm sơntìl nàng dong kờl làng bol in: “Bol añ neh sền jơh bă ù tàm xã lài do, làng bol ờ hoan geh lơh. Bol añ sồr làng bol lài jơh pal pŏ ù, ai gŏ bă suơn, nàng rơcang tam gơl phan tam, phan ròng, phan tam jăt Nghị quyết sồ 05. Tơnơ̆ mờ tŭ bơyai lơh lam sồr, bol añ neh lam sồr gùt mpồl bơtiàn lơh bal, hòi jà jơh ală mpồl lơh broă, mpồl lơh sa kă bro, kung bè ală kuang bàng, cau geh đảng tàm xã tă pơgồp. Gơwèt mờ xã bol añ neh lam sồr, tă rơlao 10 tơlăk đong nàng blơi sơntìl tờm pơnăt thái. Tàm pơnăt là phan tam geh uă jơnau kờñ mờ kung là kờñ tơn jơh jơgloh tơmù rơƀah ai làng bol tàm tơngai tus in”.

Lăk là kơnhoàl geh khà hìu rơƀah ơm dơ̆ bàr càr Dăk Lăk dê mờ rơlao 27%. Tàm hơ̆, tàm 90 ƀòn làng bol kòn cau, khà hìu rơƀah gam 60%. Uă nam do, geh uă ngan hìu làng bol kòn cau gam lời “suơn srùs, hìu srao”, ù tiah lời gời, lơh gơtìp broă tơmù rơƀah gam uă kal ke. Ồng Võ Ngọc Tuyên, Bí thư Huyện ủy Lăk pà git: Tơnơ̆ mờ mờr dùl nam lơh jăt, kuang bàng, cau geh đảng ală cấp neh lam sồr, jào pà geh rơlao 100 rơbô tờm chi sa plai ală bơta, tàm hơ̆ mìng là tờm pơnăt thái, sầu riêng, kroăc, plai bung, pơ-ò, pơ-ồs, lơ-u geh rơlao 2 tơmàn đong. Mờr 10 rơbô hìu rơƀah neh geh dờp tờm chi sơnìl geh dong kờl mờ làng bol neh tam gơl phan tam, lơh geh tơlir rơlao 200 lồ ù gời ờ geh tam phan. “Nghị quyết geh tơlik mùl màl geh cồng nha mờ geh bơta gơrềng bal uă ngan. Tus tŭ do, kơnhoàl Lăk ờ hềt geh ngui kes priă, tus tŭ do bol añ neh hòi hà ală mpồl lơh oh mi bal pà tờm chi tam ală ƀòn geh lơh oh mi in. Tàm tơngai ờ jŏ bơh ngai 5 nhai 3 tus tŭ do neh tam geh rơlao 100 rơbô tờm ală bơta. Tơlik geh nùs nhơm niam, geh kơnòl bơh Đảng, Dà lơgar gơwèt mờ làng bol, tàm hơ̆ uă ngan là làng bol kòn cau”.

Nghị quyết sồ 05 bơh Ban chấp hàng Đảng bộ kơnhoàl Lăk, càr Dăk Lăk geh lơh jăt neh mờ gam dờp uă nùs nhơm ring bal, kờñ bal uă bơh kuang bàng, cau geh đảng bal mờ làng bol. Bơh tŭ hơ̆ pơgồp bal tàm broă lơh tam gơl tàm nùs nhơm kơlôi sơnơng broă lơh bơh làng bol kis tàm ală ƀòn in, mờ chồl pràn broă lơh sa, pờ geh gùng dà nàng klàs mờ rơƀah kơl jăp tàm kơnhoàl do in.

Cau cih Tuấn Anh-Cau mlàng Ndong Brawl