VOV4.K’ho– Mờ broă ală đoàn viên mờ kơnòm bơsram tă pơgồp 1 rbô đong pah nam nàng bơt bơtàu kes priă lơh hìu kờñ gơboh kòn bơnus, mờr 8 nam do, git nđờ jơt hìu bơnhă kơnòm bơsram rƀah tàm kơnhoàl Krông Păk, càr Dak Lak neh geh dong kờl nàng geh hìu ơm kơ̆ kơljap, dờng niam rlau. Ală hìu geh lơh bơh kes priă 1 rbô đong do neh dong ală oh mờ hìu bơnhă geh tai bơta pin dờn, lơh ngan brồ guh tàm broă bơsram sră mờ rài kis.

Tàm bơta duh rơ ồl bơh trồ klò ngai dê, bi Y Đút Êban ơm tàm ƀòn Kplang, xã Tân Tiến, kơnhoàl Krông Păk, càr Dak Lak kung gam lơh ngan cò tơring ù nàng lơh bơnàng hìu. Bi Y Đút đơs, pal lơh gơ in gơs nàng cau lơh hìu gam lơh ală bơnah broă ndai tai. Uă nam do, 2 nă ùr bơklau bi ndrờm lòt lơh ơpah tàm tiah ngài, jŏ jŏ den hơ̆ sồng rê tàm hìu, 3 nă kòn dềt pal pơyua hìu mò nàng ròng siam. Hìu yau 2 nă ùr bơklau dê, mùl màl mìng là hìu kù mờr 10 thơk vuông lơm, kơlik mờ rơkàng tìm mờ sơlo yau nàng jơm tơngai, trồ mìu.

Bồ nam do, kòn klau bi Y Đút dê là sau Y Duy Niê, kơnòm bơsram ơdŭ 4D, hìu bơsram kấp 1 Ngô Gia Tự geh Huyện đoàn Krông Păk rơ wah dong kờl 25 tơlak đong lơh hìu kờñ gơboh kòn bơnus mờ ală mpồl dong kờl tai 40 tơlak đong nàng lơh hìu. Hìu pa sơn đờm lam lơh tàm bồ nhai 3 do, jơh gùt hìu bơnhă bi Y Đút dê ndrờm chờ hờp lơm: “Broă lơh sa hìu bơnhă dê kal ke ngan, mìng kơp kơnờm tàm broă lòt lơh ơpah nàng kơ lôi rơcang piang sàu àu soh pah ngai den tàng hìu ơm kung mìng lơh ing, ờ jòi geh tiah lơi nàng leng càn kờñ lơh hìu kơ̆ kơljap rlau. Tŭ do geh ală bơnah dong kờl lơh dùl nơm hìu den hìu bơnhă añ chờ hờp ngan. Geh hìu ơm den hìu bơnhă lơh ngan lơh broă, tềm pềr ngui sa nàng bơtàu tơnguh lơh sa mờ blơi tai phan ngui tàm hìu bơnhă”.

Bi Y Đút lơh broă tàm trồ klò ngai nàng cò tơnring ù lơh bơnàng hìu

Lài hơ̆, kung tàm xã Tân Tiến, kơnhoàl Krông Păk sơl neh geh 2 nơm hìu kờñ gơboh kòn bơnus ndai geh lơh. Mò Mai Thị Phương, dùl tàm 2 hìu bơnhă geh dong kờl lơh hìu yal: ù lơh sa ờ geh uă, mò pal lòt khòm phan sang nàng tac ai priă ròng 3 nă kòn gam tàm sơnam bơsram sră, broă lơh sa kal ke ngan. Tŭ geh dong kờl 25 tơlak đong lơh hìu, ùr bơklau mò lòt leng càn tai nàng lơh hìu dờng rlau. Ală đoàn viên ơruh pơnu mờ oh mi jơi nòi dong kờl ngai lơh hìu den tàng mìng tơ nơ̆ rlau 1 nhai, hìu neh lơh gơs. Mò đơs: “Khà priă do bulah gơwèt mờ cau ndai là dùl êt mơya gơwèt mờ añ dờng ngan, nùs nhơm khi kờñ gơboh mờ dong kờl he là niam ngan rlau jơh, gŏ gơ lơh chờ hờp ngan. Bơh tŭ lơh geh hìu do den kung ờ huan pal kơ lôi rơcang tai, chờ hờp rlau, tŭ do kung kơ̆ kơljap đau, dồs gloh kung tơm jơh ală bơnah priă càn tài bơh kòp jê mờ lơh hìu đam kung neh tơm jơh sơl”.

Mò Mai Thị Phương tềng đap hìu kờñ gơboh kòn bơnus geh lơh bơh nam 2016

Ală hìu kờñ gơboh kòn bơnus geh lơh bơh kes priă broă lơh “Hìu kờñ gơboh kòn bơnus- Hìu 1 rbô đong” bơh Huyện đoàn Krông Păk lam lơh bơh nam 2013. Jat hơ̆, pah nam, Huyện đoàn hòi jà tă pơgồp tàm đoàn viên ơruh pơnu, kơnòm dềt gùt kơnhoàl, tơl nă cau tă pơgồp bơh 2 rbô đong nàng lơh 2 nơm hìu ai cau geh sră dong kờl bơh dà lơgar, cau geh rài kis uă kal ke bè hìu ơm in. Bal mờ dong kờl priă, đoàn viên ơruh pơnu tàm do geh jòi tai bơta tă pơgồp halà dong kờl bè ngai lơh broă, dong hìu bơnhă kờp dŭ, bơceh mòn hìu đam dipal. Bi Võ Quốc Việt, Bí thư đoàn xã Tân Tiến, kơnhoàl Krông Păk pà git broă lơh bơh đoàn ơruh pơnu xã dê: “Pah nam ndrờm geh broă lơh lơh hìu kờñ gơboh kòn bơnus 1 rbô đong den lơh jat sră nggal đơng lam bơh Huyện đoàn dê den bol hi lam lơh tus chi đoàn ală thôn ƀòn mờ lòt sền jơh ală thôn ƀòn mờ tàm tŭ lơh hìu den broă tă sờr hìu đam, dong lơh hìu, tờ bơnàng hìu den Đoàn xã dong kờl. Jơh gùt mpồl chính trị lơh broă bal nàng tơrmù ƀà khà hìu bơnhă rƀah mờ ală hìu bơnhă uă kal ke bè hìu ơm den bơsong gờñ nàng khi in kơ̆ kơljap nàng bơtàu tơnguh lơh sa”.

Bơta chờ hờp bơh hìu bơnhă bi Y Đút Êban dê (àu caro) tàm ngai sơn đờm lơh hìu

Tus tŭ do, broă lơh hìu ơm 1 rbô đong tàm kơnhoàl Krông Păk neh dong lơh hìu ai 12 hìu bơnhă kơnòm bơsram rƀah in. Bi Nguyễn Văn Hà, Bí thư Huyện đoàn Krông Păk pà git, bal mờ bơnahg dong kờl 25 tơlak đong bơh kes priă, ală kấp bộ đoàn gam hòi jà ală bơta tă pơgồp bơh ală cau, ală mpồl dong kờl nàng lơh bè lơi tơl nơm hìu geh priă tă lơh 50 tơlak đong rlau hơđang, lơh hìu jat rơndap broă tềm pềr mờ geh cồng nha ngan rlau jơh. Broă lơh neh cèng wơl ală cồng nha ngan ngồn, ờ mìng dong kờl ală hìu bơnhă ờ geh hìu ơm kơ̆ kơljap nàng bơh hơ̆ gơtùi gàr kơ̆ kơljap rài kis, hời rơhời brồ guh tơrmù rƀah mờ gam tơnguh nùs nhơm tàm dong kờl, tàm kờñ gơboh bal tàm đoàn viên, ơruh pơnu mờ kơnòm bơsram: “Cồng nha ờ mìng ơm wơl tàm dùl nơm hìu ơm mờ gam là jơh bal dùl bơta tàm pà, bơ to bơtê ơruh pơnu, kơ nòm pa tài, kơnòm dềt git tềm pềr, bơta kờñ gơboh, sền gròi tam pà bal mờ ƀòn lơgar. Mùl màl ai gŏ, uă hìu bơnhă, kuơmàng là ală ơruh pơnu, kơnòm pa tàu, kơnòm dềt geh dờp bơta dong kờl bơh broă lơh neh geh dùl bơta pơn jờng lơh ngan, brồ guh tàm broă bơsram sră mờ hìu bơnhă kung geh bơta bơtàu tơnguh bè lơh sa mờ tus bal jơh nùs tàm ală broă lơh bơh ƀòn lơgar dê. Bơh broă lơh geh kuơ do den kung neh geh mpồl bơtiàn at tê bal, dong kờl bal”.

Mìng mờ bơh 1 rbô đong pah nam, khà priă bulah ờ dờng mơya mờ bơta at tê bal, tă pơgồp bal bơta pràn bơh mpồl đoàn viên ơruh pơnu mờ kơnòm bơsram dê, ngai sơlơ geh uă tai ală hìu kờñ gơboh kòn bơnus tàm Krông Păk geh lơh. Broă lơh bơh Huyện đoàn Krông Păk dê neh pơgồp bơnah lơh gơ rề uă nùs nhơm tam pà, tam klac bal mpồl bơtiàn tàm rơnàng cau kơnòm să, bơto bơtê ală oh bè bơhiàn niam bơnĕ “nha ngan glòm nha sèt” bơh jơi bơtiàn dê.

Cau mblàng K’Duẩn