VOV4.K’ho – Bal mờ broă lơh ngan mut lơh broă atbồ pơlam ù tiah lơh gơlik sơnơm kơnuh Ngọc Linh, càr Kontum gam chồl pràn broă tơlik mat tus drà kă bro ờ uă phan bơna kă bro bơh sơnơm kơnuh kuơ màng do. Jat rơndap broă, bơh tu\ do tus lồi nam, mpồl lơh sa kă bro dùl nă să is tam sền gàr brê Đak Tô, là dùl tàm 2 mpồl tam sơnơm kơnuh Ngọc Linh tàm càr Kontum geh tơnhàu pơgap 300 ki\ sơnơm kơnuh, nàng lơh gơlik ờ uă phan bơna kă bro.

Tờm sơnơm kơnuh tam tàm bơnơm Ngọc Linh

Broă mut lơh hìu mai\ lơh gơlik sơnơm kơnuh Ngọc Linh neh geh mtu lơh bơh nam 2015 mờ tu\ do gam tàm tơngai crap phan bơna, mai\ mok, digơlan geh lơh gơs tàm lồi nam do. Tu\ do, tàm càr Kontum geh rlau 300 lồ sơnơm kơnuh Ngọc Linh. Broă càr Kontum chồl mhar broă ai tơlik mat tus drà kă bro ờ uă phan bơna kă bro bal mờ jơnau đơs tờm mat sơnđan kă bro, bơta kuơ sơnơm kơnuh Ngọc Linh gam là jơnau pơrgon gơnoar geh tus rềp bơh cau ngui sa dê tus mờ sơnơm kơnuh kuơ màng do.

               Cau cih mờ yal tơnggit K’ Duẩn.