VOV4.K’ho – Ngai òr 15/8, tàm hìu bơsram kai 1 ntum Đak K’roong, kơnhoàl Đak Glei, Kes priă sền gàr mờ bơtàu tơnguh brê càr Kontum bơyai lơh broă lơh mblàng jơnau “ Lòt bal mờ oh tus hìu bơsram”. Do là broă lơh sơn đờm tus mờ ală broă lơh bơh Kes priă dê di nam bơsram pa, kờ` tơnguh git wă bơh ală kơnòm bơsram dê bè bơta kuơ bơh brê dê tus mờ rài kis kòn bơnus.

Pà sră cih geh lip jơnau đơs bè bơtàu tơnguh brê ai ală kơnòm bơsram in

Broă lơh gơ hòi geh rlau 460 nă kơnòm bơsram mờ ală cau pơgru bơh hìu bơsram kai 1 ntum Đak K’roong tus bal. Bơh broă lơh mblàng yal mờ bơr, mblàng yal mờ rùp pơn yơu, ală kơnòm bơsram geh git bè brê tàm tiah he ơm kis mờ ală bơta gơlik geh bal bè broă atbồ, sền gàr brê bơh [òn lơgar dê. Bal mờ hơ\, ală oh kung geh yal tai bè bơta kuơ bơh brê dê mờ bơngă là “ klờm soh tơlir plai ù dê” kung bè tàm bơtàu tơnguh mờ sền gàr bơta niam chài rơ gơi bơh làng bol Tây Nguyên dê. Di tu\ do, kờ` lòt bal mờ ală oh tus hìu bơsram, kes priă bơceh lip jơnau đơs sền gàr, bơtàu tơnguh brê mờ broă tơm priă sền gàr brê tềng bơdìh sră cih pà ală kơnòm bơsram in. Broă lơh do geh pơnjat tai mut lơh tus 106 hìu bơsram kai 1 tàm ală ntum geh broă drơng ala sền gàr brê tàm càr Kontum.